League Two club hmaah Reds chak zo lo

"Plymouth khua hi eng ang taka lian nge an nih ka hre lo a, mah se an goal bulah khan a khaw nawtin an awmkhawm ni maiin ka hria," tih chu FA Cup third round-a Liverpool-in League Two club Plymouth Argyle an draw ṭuma Jurgen Klopp-a ṭawngkam a ni a, hei hian thui takin inkhel dinhmun a hril.

Pathianni zan khan Anfield-ah Reds-in Plymouth an mikhual a, Liverpool chu chak chiang saa dah an ni. Mahse, an club chanchina first eleven-a player an luh naupan ber ṭumah Klopp-a beisei ang ngawtin thil a kaltluang lo. Plymouth lamin an tum ber an goal venghimin team pahnih hi goal khung loin an inhnehtawk - League Two club khelmualah an inhmachhawn leh dawn tihna a ni a, Premier League champion tum Reds tan league nomawi inchuh vanglai taka inkhel tur dang lo awm hi harsatna thlentu a ni thei.

A tlai lua
Jurgen Klopp-a'n League Two club an hmachhawn dawn tih hriain an league match hnuhnung bera Sunderland an draw ṭum aṭangin player 10 ngawt a thlak danglam a, Reds starting eleven kum upat zawng chawhrual hi kum 21 leh ni 296 a ni.

Liverpool tan defender Joe Gomez chu khup hliam vanga a chawlh reng hnuah October 1, 2015 hnua a vawi khat nan khelmualah a inlan a, Reds tana goal khung thei naupang ber kum 17-a upa Ben Woodburn chuan a vawi khat nan inkhel bul a ṭan bawk.

Mahse, first half-a 80.3% zet ball an chang chungin Liverpool-in Plymouth goal net tawn puar tur khawpin shot an nei thei lo. Sheyi Ojo chuan Reds tana an hun neih ṭhat ber chu hnai set sawt aṭangin a tauh lut lo a, Divock Origi goal khung chu Gary Miller laka a foul hman avangin pawm a ni lo bawk.

Klopp-a'n inkhelh nawnin buaina a thlen thei tih hriain a player ṭha rual Daniel Sturridge, Adam Lallana leh Roberto Firmino te luhtir mah se goal an khung thei chuang lo a, Sturridge-a'n a hun ṭha neih vawi thum lai a khawhral.

Plymouth 'Bus'
League Two club Plymouth-in an theihna an hrechiang a, Anfield a inkhel tur an ni tih hre bawkin 4-5-1 formation hmangin tlarhnungah player an remkhawm. Pilgrims (Ply­mouth sawina) player zinga minute 90 chhunga ball khawih hnem ber chu goalkeeper Luke McCormick a ni - English keeper hian vawi 52 zet ball a khawih.

Plymouth tlarhnungah cen­tre back Sonny Bradley leh Yann Songo'o te an khel ṭha takzet a, Plymouth fans 9,000 dawn zin chhuak ten attacking lamah au na tur nei tam lo mah se Anfield a an inhnehtawkpui hi Liverpool an nih miau avangin inkhelh zawha an thawm a ṭha hle.

Pilgrims midfielder Graham Carey chuan, "Kan khelh dan leh player te thawhrim dan kha awihawm loh khawp a ni. Anfield boruak a nuam a, kan khelmual an lokal hunah pawh hetiang boruak tho hi an tem ang. He hmunah hian fans angin inkhel ka lo en tawh a, ka sam te hi an ding sung sung nimaiin ka hria ," tiin Anfield boruak a sawi.

Eng nge an sawi?
Liverpool manager Klopp chuan, "Hmun awl min siam sak lo a, keimahni leh keimahni kha kan buai tawk em em bawk. Khatiang game kha chu ṭha taka khelh a harsa a ni. Player naupang rual kan chhawr avangin a harsa a, chutihrual chuan line up dang hmang pawh ni ila tuna kan result tho hi kan hlawh chhuak lo ang tih a sawi theih loh. Kan naute tan inzirna ṭha tak a ni," tiin player naupang rual a sawisel duh lo.

Plymouth boss Derek Adams chuan, "Tlarhnung lamah kan khel ṭha em em a, ball chang tam lo mah ila kan chan ve chhunah hun ṭha kan insiam zel thei a ni. Chawlhlawkah goal chhuah miah loa kan awm thei kha a lawmawm a, second half-ah Liverpool kha an ṭha sawt dawn tih hre chungin kan inpuahchah ṭha em em a ni. Kan hun ṭha neih chhawr theih loh chang kan nei ṭhin a, mah se tuna kan result pawh hi kan tan chuan a lawmawm em em a ni," tiin League Two a pahnihna dinhmun hauh mek tan Liverpool draw chu result ṭha tak a nih thu a sawi.

Inkhel Chhehvel
r Liverpool-in Anfield a FA Cup match an khelh hnuhnung pangaa pali zingah an khingpui goal khung loin an inhnehtawkpui.
r Reds-in inkhelh pumpuiah 76.7% ball an chang a, Premier League-ah Burnley leh Sunderland an tum ṭum chiahin hei aia tam hi ball an chang a, an chak zo lo ve ve!
r Fourth division club-in Anfield a Reds an draw hnuhnun ber chu January, 1974 kha a ni a, Doncaster Rovers chuan Reds an inhnehtawkpui.
r Plymouth-in FA Cup a top flight team an draw hnuhnung ber chu kum 1989 khan a ni a, Everton nen inhnehtawkin replay an sual chhuak.
r Liverpool midfielder Kevin Stewart-a'n first half-ah ringawt pass dik zat 53 a nei a, Plymouth team pumpuiin first half a pass dik an neih zat nen a intluk.
r January 17 zanah team pahnih hian replay an khel leh ang a, he inkhela chak zawk hian fourth round an lut ang.