London club an chak

FA Cup third round-ah Premier League hmahruaitu Chelsea-in League One club Peterborough chu 4-1 in an sawp a, league lama Blues hnehtu Tottenham Hotspur-in Championship club Aston Villa 2-0 in an hneh bawk.

Antonio Conte hote tan Pedro-a'n goal hnih a khung a, Michy Batshuayi leh Willian ten goal khat ve ve an khung bawk. Peterborough tan Tom Nicholls-a'n goal khat a khung a, Blues chak chiang mah se captain John Terry red card vang­in lawm a kim lo.

Manchester United aṭanga loan hmanga Villa zawmtu Sam Johnstone-a'n inkhel bul a ṭan nghal a, Tottenham Hotspur attack na tak erawh a dang tluan thei bik lo. Spurs tan Ben Davies leh Son Heung-min ten second half-ah an khung.

FA Cup fourth round draw hi nizan dar 12:30 khan neih a ni a, he thu ziah lai hian kan hre hman lo.

Terry leh a chhehvel

Kum 36-a upa Terry-a'n a vawi 50 nan FA Cup match-ah inkhel bul a ṭan ṭumin hnawhchuah a ni a, tun season inelna hrang hrangah match riat chiah a la inlan.

Blues boss Conte chuan, "John kha a khel ṭha em em a, tun season-a a khelh danah theihna sang tak a nei tih ka hmu a ni," tiin team captain a fak.

Terry hian red card a hmuh hma hian vawi 30 pass neiin a pass dik vek a, khingpuite nena ball inchuhna kawngah English defender hian 20% chiah a chak zawkah a ṭang a, Gary Cahill (50%) leh Kurt Zouma (60%) te a tluk lo.

French defender Zouma hian thla 11 chung inhliam vanga a inlan loh hnuah ṭha takin a rawn khel leh thei tawh a, Bournemouth aṭangin defender Nathan Ake an laklet bawk avang­in Antonio Conte-a'n tlar­hnungah player duh­thlan tur a ngah sawt bawk.

Pathianni Zan Results
Cardiff City 1 - 2 Fulham
Liverpool 0 - 0 Plymouth Argyle
Chelsea 4 - 1 Peterborough
Middlesbrough 3 - 0 Sheffield Wednesday
Tottenham Hotspur 2 - 0 Aston Villa