India captain thar Virat Kohli

Board of Control for Cricket in India (BCCI) chuan India captain aṭanga Mahendra Singh Dhoni a ban hnuah a aiawh tur an ruat nghal a, test captain nilai Virat Kohli chuan one day international leh Twenty20 lamah pawh India captain dinhmun hi a chelh tawh ang.

Tun thlaa England nena ODI leh T20 series khelh tur nei India hian England hmachhawn tur squad a puang nghal a, Jharkhand tlangval Dhoni-a'n captain nihna bansan mah se squad-ah hian telh ve ve a ni. Kum 19 leka upa wicketkeeper-batsman Rishabh Pant chu T20 squad-ah koh a ni a, January 15-a ODI match khel ṭan tur India tan inlan tura vawi khat koh a nihna a ni.

Hliam vanga chawl mek Rohit Sharma hmun ruakah Ajinkya Rahane chu koh a ni a, T20 lamah erawh Rahane aiah Royal Challengers Bangalore batsman Mandeep Singh chu koh niin test squad a hmun chang phak lo Shikhar Dhawan chu ODI-ah koh a ni bawk.

India squad-ah Yuvraj Singh koh a ni a, sawi a hlawh hle. Kum 35-a upa batsman hian December 2013 hnuah India tan ODI match a khel leh tawh lo a, T20-a a inlan hnuhnung ber chu March 2016 a World T20 a khelh kha a ni. Yuvraj hi Ranji Trophy a Punjab tan a chet ṭhat vanga koh kir a ni a, match nga a inlanah run 672 zet a vaw chhuak a ni.