Mourinho-a'n nomawi chawi a duh Man Utd Vs Hull City

Old Trafford-ah Manchester United-in ni ruk chhungin inkhel pawimawh pahnih khelh tur an nei a, Jose Mourinho-a'n January 15 zana Liverpool nena Premier League match an khelh tur pawimawhzia hrechungin zanina EFL Cup semifinal first leg an khelh hunah player pawimawh rual a luhtir dawn.

Zanin dar 1:30 a Manchester United-in League Cup semifinal-a league table mawngphaha awm Hull City an mikhual tur hi Ten 2-ah live telecast a ni ang a, January 26 zan khian KC Stadium-ah second leg an khel leh ang.

Player ṭha?

Manchester United-in FA Cup-ah Championship club Rea­ding an hmachhawn a, hemi ṭum hian Zlatan Ibrahimovic, Paul Pogba, Henrikh Mkhitaryan, Ander Herrera, Antonio Valencia leh David de Gea te an inlan lo. Mourinho hoten division hnuai zawk club hneh turin harsatna an nei lo - Marcus Rashford-a goal hnih bakah Wayne Rooney leh Anthony Martial te goal hmangin 4-0 in an chak.

Hull City nena an inkhelh tur chungchang sawiin Mourinho chuan, "Reading kan hmachhawn ṭuma khel loin Hull City an hmachhawn ang. Kan ṭhat dan ber emaw kan ṭhat dan ber dawttu tia sawi ka duh lo - kei chuan player hahdamna hun neite tiha sawi ka duh zawk. Hetia ka sawi takah chuan ka player chhawr dan tur pawh hriat a awl ang. Zlatan, Pogba, Herrera leh Valencia ten FA Cup an khelh loh avangin Hull City an hmachhawn ang," tiin a sawi.

Portuguese manager Mou­rinho chuan, "Hull pawhin keini ang thoin semifinal an khel dawn a, an tan pawh inkhel pawimawh a ni. Anni tan hian Premier League kartawpa Bournemouth nena kan inkhel tur nen a pawimawh zawk em chu ka hre lo a, keini chuan final thlen hi kan duh a ni. Second leg khelh tur a la awm tih kan hria a, amaherawhchu khualmuala khel tur kan nih avangin first leg-a chinfel theih kan duh a ni," tiin nomawi chawi theih apiang chawi an duh thu a sawi.

United manager Mourinho hian Liverpool nen kartawpa an inkhel tur a ngaih pawimawh thu sawi tel mah se a thutlukna aṭangin Hull City an hneh zawh hnuah league atan an inpuahchah chauh dawn niin a lang. Reds pawhin EFL Cup semifinal an khel ve tho dawn a, Jurgen Klopp hote hian Nilaini zan hian St Mary's Stadium-ah Southampton an hmachhawn ang.

Hull ve thung

Hull City-in United assistant manager hlui Mike Phelan an ban a, Sporting leh Olympiakos coach hlui Marco Silva an lalut. Portuguese manager hnuaia an match hmasa berah Hull-in manager thar nei ve tho Swansea chu 2-0 a hnehin FA Cup fourth round an lut.

Hull tana thu lawmawm chu match 23 chhung clean sheet an neih loh hnuah Welsh club lakah goal an chhuah lo a, goal hnih an khung bawk. Tigers hian league-ah Mourinho enkawl United hi 1-0 in an hneh lo a, coach thar Silva hnuaiah thil mak thlentir an tum ang.