Barca tan nomawi a hla tual tual

Luis Enrique enkawl Bar­celona tan La Liga nomawi a hla tual tual - Catalan club hian Pathianni zan khan khual­mualah Villarreal chu hun tawp dawna Lionel Messi goal khung hmangin 1-1 in an inhnehtawkpui hram a, Granada laka 5-0 a chak hlim hmahruaitu Real Madrid nena an inthlauhna chu point nga zet a ni ta.

Barcelona hian La Liga table-ah pathumna dinhmun an luah mek a, Real aiin match khatin an khel tam zawk! Pahnihna dinhmun luahtu Sevilla aia an hniamna chu point khat niin an hnuai chiaha awm Atletico Madrid nen point liin an inthlau mek bawk.

A pawi

Luis Enrique-a'n league match 150 Barcelona a kaihhruaina inkhelah hnehna chan ngei beisei mah se beisei ang ngawtin thil a kaltluang bik lo. First half a goal a luh loh hnuah rin loh zawk Villarreal-in chawlhlawk zawhah goal hmangin bul an ṭan. Alexandre Pato chuan Barca tihsual nangchingin minute 49-naah Nicola Sansone tan a siam sak a, Italian forward tan keeper Marc-Andre ter Stegen-a vena khung turin harsatna a awm lo.

Barcelona tana goal 99 khungtu Luis Suarez-a'n century siamna hun ṭha nei mah se vawi tam chance a hlah a, Barca chak loh chhanah hun ṭha khawhralṭhintu Neymar a dem theih bawk. Catalan club an vanduai laklawh a, Messi chuan goal post a pet per bakah Argentine for­ward goal shot hi Bruno Soria­no chuan a kutin a lo dang bawk. Yellow Submarine de­fensive midfielder chet dan avangin Barca-in penalty beisei mah se referee-in a pe lo a, an vanduai.

Minute 90-naah pawh Villarreal-in hma an la hruai a, kum kaw hnua a vawi khat nan Catalan club lakah chak hmel an hmu ve dawn niin a lang hman. Mahse, Bruno bawk chesualin Messi lakah free kick a chawi a, Argentina captain hian free kick ropui hmangin an si phurh sutna goal a khung. Injury time-ah mualneitu club full back Jaume Costa hnawhchhuah ni mah se Barca tan an tam zawkna chhawr ṭangkai turin hun a tam tawk tawh lo.

Chak phu inti Enrique

Barcelona manager Luis Enrique chuan draw result hlawh chhuak mah se chak an phu thu sawiin, "Kan team hian hnehna chan kan phu a, kha aia result ṭha zawk kha kan phu a ni. Mahse, football hi chu a chang chuan a fair lo ṭhin em em a ni," a ti.

Spanish manager chuan sawi chhunzawmin, "Villarreal khan player quality sang tak tak an nei a, an khelhdan phung an belin ball an chan leh chan loh lai pawn an ṭhat dan a ngai reng a ni. Villarreal te ang team ṭha tum chuan a harsa dawn tih kan hria a, mah se chak kan phu a ni. Ka player te hnenah sawi tur dang pawh ka nei hran lo a, game ṭha tak kan khel a ni," tiin a naute a sawisel duh lo.

Kum 46-a upa manager chuan Real nen an inthlauhna tam tawh mah se an la beidawn loh thu sawi nghalin, "League match tam tak khelh tur a la awm a, kan theihtawp chhuahin kan bei chhunzawm zel ang. Hmasawn zel kan tum ang a, kan buai mekna hi a tihdamna kan zawng ang," a ti.

Rakitic a derthawng?

Kum 2019 a Nou Camp a contract hmang zo tur Ivan Rakitic chu tun hnaiah Manchester City nen sawi zawm an ni a, Croatian midfielder hi Villarreal khelmualah chhawr a nih loh avangin a chhuak ngei dawn nia ngaih a ni.

Mahse, Barca boss Enrique chuan he thuthang lengvel hi phain, "Rakitic inlan loh chhan hi City lama a kal dawn vang a ni lo. English media an ni emaw, Croatian media an ni emaw, he thuthang ziaktu te thuchhuah hi engmah rintlak a awm lo," tiin a sawi a, a midfielder pawimawh chu Nou Camp ah a cham chhunzawm tur thu a sawi.