Arsenal tana khelh chhunzawm duh - Ozil

Mesut Ozil chuan Arsenal tan hun rei zawk khel tura contact thar ziah a duh. Germany in­ternational hian a club tana rinawmna thu a ziah hma ngeiin manager Arsene Wenger dinhmun tur hriat chian hmasak a duh thu a sawi chhuak.

Gunners playmaker hian kum 2013 khan Real Madrid aṭangin London club hi a zawm a, tunah hian thla 18 chhung chiah contract a nei tawh. North London club hian an player ṭha hi contract thar ziahpui ngei an duh a, mah se tun thlengin inremna an la siam lo thung.

Ozil chuan, "Arsenal-ah hian ka hlim em em a, fan-te pawhin cham chhunzawm turin min duh a - kei pawh contract thar ziak turin ka inpeih. Ka thil duh tihlawhtling theitu chu club a ni," a ti.

Spanish club aṭanga amah la chhuaktu Wenger chungchang sawiin Ozil chuan, "He club ka zawm theihna chhan chu Arsene Wenger a ni a, ani hian ka chungah rinna a nghat ngamin amah vanga Gunners zawm ka ni. Club lam pawhin min hrethiam a, contract ziah hmain kan manager hmalam hun hi hriat chian ka duh," a ti. French manager Wenger hian tun season chhung chauh hi North London club tan hian contract a nei tawh.

Arsenal legend Thierry Henry chuan Ozil leh amah ang tho a thla 18 chhung chauh contract nei tawh Alexis Sanchez ten hlawh tam tak phut a contract an pawt sei mai lo chuan club a tih luhai thu a lo sawi chhuak tawh.

Kum 28-a upa Ozil chuan Henry thusawi chhangin, "Mi tupawhin an duh duh an sawi thei. Arsenal player hlui an ni emaw ni lo emaw pawh ni se an thu sawi hi ka ngaihven lem lo. Eng thu pawh sawi se kei leh club inkarah nghawng a nei lem lo," a ti.

Thla hmasa khan Arsenal manager Wenger pawhin Arsenal chu club lian an nih avangin player pahnih khat lek vanga buai tur an nih loh thu a lo sawi tawh. Wenger chuan, "Club lian eng pawhin player ṭha an chan chang a awm ṭhin. Arsenal hi club lian kan nih avang player tlemte vanga buai tur kan ni lo, tunah hian kan sum dinhmun a ṭha tawk," tiin a lo sawi tawh a ni.

FA Cup fourth round lut hlim Arsenal hian kartawpah league match an khel chhunzawm leh nghal dawn a, Inrinni zanah Swansea City an lenchilh ang.