I League Bagan leh Mumbai an chak

Federation Cup champion Mohun Bagan-in tun season-a an I League match hmasa berah Churchill Brothers 1-0 in an hneh. Hetiang zat bawk hian Santosh Kashyap-a kaihhruai Mumbai FC-in Maha Derby-ah DSK Shivajians an hneh bawk.

Pathianni inkhel pathum zinga a hmasa berah I league club thar pahnih Chennai City FC leh Punjab Minerva FC te an inhmachhawn a, goal awm loin an inhnehtawk.

Jeje tel lohna

AIFF Player of the Year Jeje Lal­pekhlua'n training a zawm tlai avangin Vanglaini palai hnen­ah a khelh loh tur thu a sawi lawk a, Mohun Bagan-in Goan club Chur­chill Brothers an hneh ṭum hian Hnahthial tlangval hi a inlan lo.

Mariners tan Balwant Singh-a'n minute 28-naah goal awm­chhun a khung a, Swansea City forward hlui Darryl Duffy-a'n Bagan tana I League a khelh hmask berah hnai tak aṭangin chance ṭha bik a hlah thung.

I League-ah foreign player-in hmun pawimawh an chang ṭhin a, hei vang hian Jeje-a elpui ber tur chu Balwant Singh a ni. Punjabi tlangvalin a pet goal avangin Bagan boss Sanjoy Sen-a'n khelhna hun a siam sak hunah Mizo tlangval tan chetsual a thiang lo ang.

Mawitea telna

Chennai City FC coach Robin Charles Raja-a'n Minerva Punjab hmachhawn turin Malsawmfela te unau squad-ah a dah a, kum naupang zawk Lalnunmawia'n inkhel bul a ṭan.

MPL5-a Bethlehem VT for­ward Mawitea hian ṭantirh lamah chance ṭha ṭum hnih a nei a, goal-ah a chantir thei lo ve ve. JN Stadium, Chennai-a inkhelah mualneitu an chungnung zawk a, Minerva Punjab lam tana Aizawl FC forward hlui Joel Sunday-a khung tur chu Chennai keeper Karan­jit Singh-a'n ṭha takin a dan sak.

Minerva Punjab hian Zir­tawp­ni tlai hian RG Stadium, Mual­puiah Aizawl FC an hma­chhawn dawn. Lunglei tlangval Lalrempuia'n document pawi­mawh a tih fel hman erawh chuan Mizo player pakhat nei chungin Aizawl an rawn pan thei ang.

Mumbai an chak

Mumbai FC-in tlarhnung ti­chak turin Delhi Dynamos aṭang­in Lalchhawnkima an lalut a, Champhai tlangval hian minute 90 khelin goal an chhuah lo. Santosh Kashyap hote hian Maha Derby-ah minute 22-naa Thoi Singh-a goal hmangin Mizo tamna DSK Shivajians an hneh.

DSK-ah Mizo pali Jerry Mawi­hmingthanga, Lallianzuala Chhangte, Lalṭhathanga (Puitea) leh Sairuatkima ten inkhel bul an ṭan a, bench aṭangin Chennaiyin aṭanga an hawh left back Jerry Lalrinzuala a lut bawk.

Santosh Kashyap chuan, "Mumbai FC chu a sang pathum zingah kan tel tur a ni," tiin inelna ṭan hmain a sawi a, in­khelh banah pawh Salgaocar coach hlui hi a la ṭawng pawr tho. Mumbai coach chuan, "Team thawhhona ṭhat vanga chak chauh kan ni. Foreign player hi a rang thei ang berin lak kan tum a, tunah kha chuan goal nawr nat dan tur 10% chauhin kan la nawr a ni," tiin a sawi.

Mumbai FC-in foreigner an chhawr lo a, DSK lamin pla­yer naupang an chhawr thung. David Rogers chuan, "Chance ṭha­hnem tak kan insiam a, goal kan khung lo mai chauh a ni. Ka player nau­pang rual ka chhuang a, ka thutlukna hi club leh Indian football-in a hlawkpui ang," tiin a sawi a, I League match hmasa ber aṭangin inzir belh tur an neih thu a sawi bawk.