Mahni khelmuala chak zawn rei ber Juventus

Juventus chu Serie A club zingah mahni khelmuala hnehna chang zawn rei thei ber an ni. Juve hian Pathianni zan khan Gonzalo Higuain goal hnih hmangin Bologna 3-0 in an hneh a, Juventus Stadium-ah a zawnin league match 26 chhung hnehna an chang tawh.

Turin club tan hian khawvela player manto pathumna Higuain chuan pound maktaduai 75 man a nihzia a pholang leh. Argentina international hian goal hnih khungin a team a chakpui a, tun season-a a league goal 13-na niin Juve tan inelna hrang hrangah goal 16 a khung leh der tawh - Juve goal khat dang hi penalty aṭanga Paulo Dybala khung a ni thung.

Old Lady (Juve sawina) hian kum 2011 September thla aṭang khan Juventus Stadium an luah ṭan a, hemi hnuah season nga chhung chu league champion an ni tawh a, kuminah hian a vawi ruk nana champion turin an dinhmun a ṭha leh tawh. Match 18 khelh aṭanga point 45 hmuin hmahruaitu an ni a, anmahni hnaih bertu leh anni aia match khata khel tam zawk AS Roma aiin point liin an sang zawk.

Allegri thukhawchang

Juventus coach Massi­miliano Allegri chuan, "Kan tum ber chu league nomawi chawi a ni a, hna hautak tak a ni dawn tih erawh a chiang. Roma bakah Napoli hian na takin min nawr reng a, kan tan inthlahdah zeuh pawh a thiang lo," a ti.

Arsenal nena an sawi zawm Allegri chuan Premier League club zawm tumna a neih loh thu a sawi a, a club enkawl laiah a hlim tawk thu a sawi tel bawk.

Serie A nomawi vawi hnih chawi tawh Allegri chuan, "Juventus-ah hian ka hlim tawk a, min ban a nih loh chuan ka tan chhuah chhan tur a awm lo," tiin a sawi. Italian manager hian Antonio Conte a thlak hnuah a zawnin league-ah a champion bakah Champions League final a khelhpui tawh bawk.

Kum 49-a upa Allegri chuan, "League bakah Eu­rope-a hlawhtlin kan duh. Champions League-ah chuan thil pakhat tihsual zeuh hian danglamna a siam vek thei a, fimkhur a ngai bik hle. He inelna liana champion tur chuan league season a zawh hnuah pawh inkhelh a la ngai ṭhin a, chuvangin squad neih chhah pawh a ngai," a ti.

Roma an chak

Luciano Spalletti-a enkawl Roma chuan nikum October thla hnua a vawi khat nan khualmualah hnehna an chang ve ta. Roma hian Africa Cup of Nations khelh vangin forward Mohamed Salah an chhawr thei lo a, goal awmchhun hi minute 36-naa Genoa defender Armando Izzo-a'n an lama a tih luh niin Roma hi 1-0 in an chak.

Roma midfielder Daniele De Rossi chuan, "Hnehna ropui tak a ni. League hautak takah kan inel a ni a, vawi khat chak pawh a harsa. A bik takin khualmualah point hmuh a harsa hle a, tun ṭuma kan result avang hian inkhelh lehpekah pawh inrintawkna kan nei belh ang," tiin a sawi.

Milan club an chak

League table-a pangana AC Milan chuan Carlos Bacca goal khat hmangin Cagliari 1-0 in an hneh. Cagliari defender Bruno Alves chu hun tawp dawna Bacca a tihtluk avangin hnawh chhuah a ni a, a team te player tem zawk ni turin chhuahsan mah se an goal hnihna tur a chhanhima ngaih a ni thung.

Inkhel dangah Inter Milan chuan Udinese lakah si khat an phurh zet hnuah Ivan Perisic-a goal hnih hmangin an chhanglet a, 2-1 in hnehna an chang.