Thiago-a'n Arsenal a hmachhawn dawn

Bayern Munich coach Carlo Ancelotti chuan a player inhliam vanga chawl mek Thiago Alcantara chu Champions League last 16-a Arsenal nen an inkhelh hunah a chhawr theih tawh a beisei thu a sawi. Spain international Thiago hi kartawpa Qatar-a an training-na hmunah a malpui a ti na a, a chawlh chen tur hi chiang taka puan a la ni lo.

Ancelotti chuan a player hliam chungchang sawiin, "Rei tak a chawlh a ngaih ka ring lo. Munich-ah a hliam hi endik a ni ang a, ka beisei ang chuan Arsenal a hmachhawn thei ang," tiin a sawi.

Bayern Munich hian thlasik chawlh an hmang mek a, Janaury 20 hian kumina an league match hmasa ber atan Freiburg an hmachhawn ang. February 15 hian Premier League club Arsenal chu Champions League last 16 first leg khel turin Alianz Arena-ah an lo mikhual dawn a ni.