Atletico an chelh ding; Real inlan zan

Season thara Champions League khelh tumin an kalkawngah harsatna an tawk a, season thara European club football inelna sang ber khel turin an dinhmun a la chiang hleithei lo. 

Thawhlehni zan khan Atletico Madrid hian khualmualah Celta Vigo an lenchilh a, Alvaro Morata chuan tun season La Liga-a goal rang ber khung mah se Celta nen 1-1 in an inhnehtawk. Hetihlai hian Spanish La Liga champion ni tura kawng zawh mek Real Madrid chu zanin dar 1:30 hian an inlan dawn a, Alaves an mikhual ang. 

Real hian zaninah hnehna an chang thei a nih chuan nizana inkhel Barcelona-in hnehna chang pawh ni se champion turin match thum khelh tur an la neihah vawi hnih chak a tawk - Barca result hi kan hre hman lo. 

Celta Vigo khelmualah Atletico Madrid-in goal khung turin an nghah rei a ngai lo a, second 51-na lekah Alvaro Morata chuan goal hmahruai a khung nghal. Celta Vigo tan chetna hman a awm lo a, an hawihai.

Inkhel hamrik a rik rual deuhthawin Santiago Arias chuan Angel Correa tan a siamsak a, kum 25 mi Correa hian Morata tana hahdam taka khung turin a siamsak - Spanish striker-in a ti beidawng lo. Chelsea-a beisei a phak loh hnua Atletico tana a hming chher leh mek Morata hian kar hmasa lawka 3-0 a Mallorca an hneh ṭumin goal hnih a khung bawk a, a match hnuhnung pahnihah goal thum a khung tihna a ni. 

Kum 27 mi Morata hian tun season La Liga-ah match 31 khelin goal 12 a khung tawh a, inelna hrang hrangah match 40 khelin goal 16 a khung a, assist vawi thum a nei - a season ṭha ber 2016-17 a Real Madrid tana match 43-a goal 20 khung chu a phak ṭep ta. 

Spanish striker-in second 51-na lekah goal a khung a, tun season La Liga-a goal lut rang ber a ni. Mahse, Atletico-in goal dang erawh an zawng hmu leh thei lo a, minute 90 chhunga goal dang kan hmuh leh pawh Celta Vigo lam khung a ni. 

Morata goal khung tur siamsaktu Correa-a'n first half tawp lamah chance nei ve mah se a chhawr thei lo a, second half ṭan aṭanga minute linaah Fran Beltran hmangin Celta hian an hrem zui. 'The Next Xavi' tia hming lem an pek, kum 21 mi lek midfielder Beltran hian Jan Oblak-a dan rual lohin si phurh sutna goal hi a khung - he nau hi lo chhinchhiah bik la, a chanchin i la hre chauh mai thei. Celta goalkeeper Ruben Blanco aiin Oblak-a'n hna a ngah zawk niin a lang a, mahse hun tawp thlenga goal dang lut loin team pahnih hi point khatah an lungawi a ṭul. 

Real Madrid-in Covid-19 vanga league chawlh lailawk a nih hmain beisei an phak lo a, an talbuai - an vanneihna chu an elpui Barcelona an lo talbuai ve chiah hi a ni a, coach Ernesto Valverde pawh ban a ni. 

Mahse, coach thar Quique Setien hnuaiah Barcelona an insiamṭha lo a, an buai lehzual zawk ang hialin a lang - hetiang boruak karah vanneihnain Real lam a ṭang a, champion an hnaih ta hle. Real hian La Liga khelh chhunzawm leh a nih hnua match sarih an khelhah hnehna an chang vek a, an match hnuhnung pahnihah 1-0 ve vein an chak a, an goal hi penalty aṭanga lut ve ve a ni! Alaves hi table-ah 16-na ni mekin tla thei dinhmunah an ding a, tlak hlau hmachhawn hi Real tan hna awlsam a nih dawn loh avangin fimkhur a finthlak ang.