Liverpool tan Champions League final a chiang?

Premier League club Liverpool fans tan men rei man a awm leh ta a, zan men rei vangin electric bill sang mah se a na an ti lo ang - Nilaini zan khan Champions League semifinal first leg-ah 2-0 in Villarreal an hneh leh ta.

Reds tan Pervis Estupinan (own goal) leh Sadio Mane ten goal khat ve ve an khung a, Villarreal lamin a chhanletna tur an neih loh avangin kut ruakin Anfield an chhuahsan.

Liverpool-in si hnih faia hnehna an chan avangin an ke lehlamin final an rap tawh, tiin a sawi theih a, Jurgen Klopp-a leh a hoten Premier League lam an hawi leh thei ta.

Merseyside club hian Inrinni tlai dar 5:00-ah Premier League match an khel zui dawn a, tun hnaia hmasawn tak Newcastle United an lenchilh ang.

Villarreal an fimkhur
'European specialist' tih hiala hming lem an pek Unai Emery-a'n Anfield-ah atthlak taka goal nawr a tum lo a, Spanish coach hian fimkhur takin tlarhnung lamah a player a rem ṭhap.

Khawvela tlarhma nei ṭha ber pawl Liverpool tan meuh pawh Villarreal tlarhnung tawn tlang a harsa - Reds-in ball an keng a, Villarreal lamin hnai takah an en a, chhuah an tum lo a ni ber!

Emery-a'n Champions League aṭangin Juventus leh Bayern Munich a pet chhuak a, defensive game khel chungin team pahnih lakah goal ruk an khung thei - an lamah goal hnih chiah a lut.

A tawi zawnga sawi chuan, Spanish manager hian Juve leh Bayern laka a hlawhtlinpui kha hlawhtlinpui a tum a, defensive game karah a kua an hmu a nih chuan an chance neih chhun chhawra chak an tum.

Kha le Sapui!
Mahse, an match hnuhnung bera Everton-in 'bus' an 'park' hnan tawh Liverpool-in beidawn an tum lo a, goal khung theihna chance an zawng reng a, an khelh danah beiseina an nei tih a lang.

Second half-ah Reds-in an game an rawn tirang lehzual a, Juve leh Bayern aia ṭha zawk an nih avangin Emery naute tan duhtawka Liverpool player-ten an nawr reng chu dawl zawh reng chi a ni lo.

Sapuiin a sa seh tur bawh nghal lo a, a chauh leh remchan hun a chang angin Reds player-ten Villarreal an hrem theih hun tur chawl loin an chang reng a, minute 53-naah an hlawhtling.

Fabinho goal khung an pawmsak loh hnuah chau ve thei lo Jordan Henderson chuan ṭha takin ball a cross a, Villarreal defender Estupinan-a'n dan a lo tumna lamah keeper Geronimo Rulli man phak lohin an lamah a ti goal.

Mane a inlar
Villarreal tlarhnung inrem ṭha tak karah Liverpool-in goal an khung a, goal khatah duhtawk mai an tum lo - goal an khung aṭanga minute hnihna lekah Sadio Mane hmangin an belhchhah.

Mohamed Salah ball pek ṭha tak chu Mane hian harsatna nei loin goal-ah a chantir a, kum 30 mi forward tan tun season-a Reds tana goal 20 a khungna chiah a ni.

Football khawvelin Ballon d'Or chawimawina dawng tura Karim Benzema hming a lam chamchi a nih pawhin Mane theihnghilh a thiang lo.

Senegal international hian AFCON-ah an ram team a champion pui a, World Cup khel turin a inpetkaipui a, Liverpool tan season khata nomawi pali chawi thei dinhmunah a ding mek bawk.

Hello quadruple
Carabao Cup champion Liverpool hian FA Cup final an lut tawh a, Premier League-ah point khat lekin hmahruaitu Manchester City an phak lo a, Champions League final an hnaih ta viau bawk.

English football club dangin an la tih theih ngai loh ti thei dinhmunah an ding mek a, Reds tan nomawi pali a hnai zel. Liverpool defender hlui Luis Enrique chuan, "Nomawi pali hi an chawi thei ang. Mahse, thil theih loh ang deuhthaw a ni a, 1% chance erawh a awm," a ti.

BBC senior football reporter Ian Dennis chuan, "Ni 31 chhungin game riat an khelh a ṭul dawn a, final match ang vek a ni dawn - ropuina ram an hnaih ta hle," a ti a, Reds tan beisei a neihpui.

Liverpool striker hlui Michael Owen chuan, "Nomawi pali chawi chu thil theih loh a ni a, mahse, tunah chuan a theih mai rinna a lian ta viau a ni," tiin a sawi ve bawk.

Game ṭha tak a ni a, first half kan khelh danah pawh ka lawm - goal kan khung lo a, chu zawng chu kan buaina a ni. Chutihrual chuan tlarhmaa player nei ṭha tak an ni a, kan dang chat thei a ni.
Chance siam kan tum a, kan tum dan pawh kan thlak a, hun ṭha kan neih fo rualin goal kan khung lo. Second half-ah ṭha takin kan buaina kan ching fel a, kan goal khung pahnih pawh a ṭha hle. Goal thumna khung kan duh a, mahse, game control zui kha ngaihtuah tel a ṭul a, kan tisual lo. Football-ah chuan thil danglam vak a awm lo. Tlarhnung ven dan hmangin khingpui zahna a lantir theih a, chutiang tak chuan kan tih avangin ka lawm. Kan nawr let apiangin a ṭha a, inkhel ṭantir aṭanga a tawp thlenga kan beih avangin kan chak a ni. Half time chauh a la ni a, mahse, inkhelh hma ai kha chuan kan dinhmun a ṭha ta. Second leg-ah chuan Gerard Moreno pawh an nei tawh mai thei a, inkhel a la tawp lo. Mahse, zaninah hian 0-0 pawh ni se kan inkhelh leh tho a ngai a, kan tan buaina tur a awm lo e. - Jurgen Klopp, Liverpool manager

Sawi tur vak ka nei lo - Liverpool khan chak an phu a ni. First half-ah khan tlarhnung ven kawngah chuan kan khel ṭha viau a, mahse, goal nawr lamah engmah kan ti lo thung. Vawi hnih emaw vawi thum chance an nei a, second half-ah pawh chutiang tho chuan an rawn tih avangin goal khung an phu a ni. Liverpool tan chuan 2-0 a chak hi a ṭha a, kan tan erawh result ṭha lo a ni - mahse, beiseina neih tlat kan tum ang a, kan khelmualah thil danglam tih kan tum ang. Liverpool kan mikhual hun chuan a danglam dawn a, tactically pawhin kan thlak ang. Zanin ai ngawt chuan an talbuai dawn. - Unai Emery, Villarreal coach

Champions League Semifinal
First Leg
April 26, Thawhlehni Zan
Manchester City 4 - 3 Real Madrid
MAC: Kevin de Bruyne 2'; Gabriel Jesus 11', Phil Foden 53'; Bernardo Silva 74'
REA: Karim Benzema 33', 82' (P); Vinícius Júnior 55'
April 27, Nilaini Zan
Liverpool 2 - 0 Villarreal
LIV: Pervis Estupinan 53'; Sadio Mane 55'
Second Leg
May 3, Thawhlehni Zan
Villarreal 12:30 AM Liverpool
May 5, Nilaini Zan
Real Madrid 12:30 AM Manchester City