MCL semifinal an khel dawn

Tualchhung cricket inelna lian - Mapuia Memorial Mizoram Cricket League chu vawiinah semifinal an khel dawn, nimin khan league round khelh zawh niin - Chanmarians, Ramhlun Venglai, Chhinga Veng leh Kulikawn ten semifinal hi an lut.

Hneh loh tawng loa kaltluang lai Chanmarians hmaah palina Kulikawn an ding dawn, league round kan thlirkir chuan Chanmarians hi chak tura rinkai an ni. Mahse, Kulikawn hian tawnhriat an nei ṭha, tun hnaiah an insiamṭhat bawk avangin beisei an nei ngam ang.

Ramhlun Venglai leh Chhinga Veng hi tun hnaiah an intawng fo; final luh an inchuh leh ang. Tun tournament league round-ah vawi khat ve ve an inhneh tawn. Mahuma Memorial final-ah erawh RVL hian 3C hnehin nomawi an chawi, tun ṭumah hian chak beiseina an nei ngam ve ve dawn.

MCL-ah hian Cricket Association of Mizoram (CAM) hnuaia first division team ṭha pali chu tling sa an ni a, hmunruak pahnih leitu Luangmual leh Bawngkawn South te an inlan bawk. Mahse, anni pahnih hi chuan semifinal an inhlangkai zo ta chiah lo a ni.