Inter Milan an chak lo; AC Milan tan lawmna

Serie A champion lai Inter Milan chu Bologna lakah 2-1 in an chak lo. Simone Inzaghi naute hian khelh zat inangah AC Milan chu point hnihin an phak lo, match khelh hmabak pali ve ve an la nei, nomawi inchuh boruak a sang zel dawn.

Inkhel dangah Atalanta an chak zo lo a, season thara Champions League khelh beiseina thamral vek lo mah se a theih loh tluk a ni tawh. Fiorentina pawh Udinese lakah si li faia an tlawm avangin palina an ni phak tawh lo ang.

Inter an tlawm
'Match khatin kan khel tlem zawk, kan la tlan pel thei,' tih chu Inter Milan inhnemna a ni ṭhin. Nilani zan khan chu an hun ṭha chu pek an ni a, dinhmun duhawm takah ding hmasa bawk mah se a tawpah a chesual zawk an ni a, kawng a harsa tawh dawn.

Minute thumna lekah Ivan Perisic-a'n goal mawi a khung, mual sir lam aṭanga ball la lutin, ball chhuhsak tumtu Musa Barrow kapkara a thun hnuah box hmawr kil aṭangin a thlawh lut, goal mawi leh ṭha bik zinga chhiar tel a ni ang.

Inter lawm chhung erawh a rei bik lo. Premier League lama sulhnu nei tawh Marco Arnautovic chuan minute 28-naah a tauh lut a, table mawng lama awm Bologna tan beiseina a siamsak, chawlhlawk hmain goal dang a lut zui lo.

Second half-ah pawh goal kan hmu mai lo, hun tawp dawnah Samir Handanovic aia lut Inter goalkeeper Ionut Radu a chesual. Perisic-a theh (throw) chu awlsam taka lo petchhuah theih a ni, defender-in keeper tan a kian zui - mahse Radu hian a lo dan ṭhelh.

Bologna hmatawng Nicola Sansone-a'n a lo hnaihchilh hman bawk si, keeper berin a lo dan fuh loh takah chuan goal ruakah nuamsa takin a khung. Chak lo zawk tura ngaih team khan a tawpah chuan point thum hlu tak an hlawh chhuak.

Radu an hnem
Hamrik hnuhnung a rik hnuah Inter goalkeeper Ionut Radu chuan hrehawm ti takin khelmual a chhuahsan a ngai, fans lam aṭangin auelna a dawng nasa viau. Serie A nomawi (Scudetto) inchuh vanglai a nih avangin fans pawh dem theih an ni bik lo.

Nerazzurri player lam erawhin an teammate chetsualna hi an hriatthiampui. Inter defender Denzel Dumfries chuan, "Mimal thil a ni lo, hei chu team thil a ni. Kan result avangin kan lawm lo, kan chak lohna hi mimala hmehbel chi erawh a ni lo ang," a ti.

Inter manager Simone Inzaghi chuan, "First half kan khel ṭha hle, tihsual pakhat kan neihah Arnautovic khan min hrem. Remchang dang kan insiam hnem chunga goal kan khung belh lo kha a pawi lai chu a ni ta.

"Second half-ah beisei kan phak lo, hma kan sawn lo bawk. Tunah chuan hmalam kan en a ngai tawh, league chauh ni loin Coppa Italia thlenga hlawhtlinna chan kan duh, chumi tur chuan kan thawkrim chhunzawm ang," a ti.

Serie A-ah hian point hmuh a inzat chuan team pahnih intawn tawhna en tur a ni. Head-to-head en chuan Inter hi Milan hnuaiah an awm, chuvangin champion tur chuan Milan chetsual an chan a ngai tawh dawn.