Curry leh Giannis ten an team an tlangpui

Player ṭha leh ropui bik Stephen Curry leh Giannis Antetokounmpo te chuan an team an chakpui ve ve a, an chak chho zel a nih chuan anni pahnih hi NBA Finals-ah an intawng thei dawn a ni.

Curry awmna Golden State Warriors hian Denver Nuggets lakah 102-98 in hnehna an chang, best of seven series chu 4-1 in an la. Western Conference semifinal-ah chuan Memphis Grizzlies leh Minnesota Timberwolves inkhela chak zawk an tum ang.

Warriors tan Curry hian playoff china a vawi khat nan inkhel bul a ṭan, a kephah hliam a dam chiang tawh tih lantir nan point 30 a nei, ṭum nga ngawt 3-points a vawm luh leh tak avangin a thiam a la theihnghilh lo tih kan hmu.

Warriors shooting guard Klay Thompson chuan, "Steph Curry hi chu player danglam bik a ni, ani ang player hi chu hmuh tur pawh an awm tawh kher lo ang. Team-in an mamawh ang hi a takin a thlentir thei," tiin a ṭhianpa a dah chungnung hle.

Eastern Conference lamah Antetokounmpo hoa khel Milwaukee Bucks chuan Chicago Bulls 116-100 in an hneh, game 5 an khelh chunah vawi khat chauh chak loh nei chungin series chu 4-1 thoin an la ve bawk.

Bucks tan an thiampuipa Antetokounmpo chuan point 33 a nei. A point neih zawng zawng zinga 15 hi quarter hmasa bera a neih a ni a, bul an ṭan fuh miau avangin hlauthawng loin an awm thei. NBA champion hian conference semifinal-ah Boston Celtics an tum ang.

NBA most valuable player vawi hnih ni tawh Antetokounmpo chuan, "Game 2 kan khelh zawh khan eng anga hmachhawn tur nge an nih kan hre thei tawh. Mimal chetṭhat a tawk lo a, team pumpui khelh ṭhat a pawimawh.

"Tunah chuan team hran, khelh dan hrang nei kan hmachhawn tawh dawn. Tuna kan game ṭha tak ang hi kan neih chhunzawm theih ngei ka beisei," tiin a sawi. An tum leh tur Celtics Atlanta Hawks sawptu an ni a, inkhel a awlsam lo ang.

NBA Playoff
Chicago Bulls 100 - 116 Milwaukee Bucks
(Bucks hian 4-1 in series an la)
Denver Nuggets 98 - 102 Golden State Warriors
(Golden State hian 4-1 in series an la)