Valencia tan Lee Kang-in

South Korean rawlthar duhawm Lee Kang-in chuan Thawhlehni zan khan Real Valladolid lakah goal a khung a, a club khelhna Valencia chu 2-1 in hnehna a chanpui. 

Valencia khelmualah mualneitu team tan Maxi Gomez chuan minute 30-naah goal hmahruai a khung a, Valladolid hian a tlawm bik nih duh loin second half ṭan aṭanga minute hnihna lekah Victor Garcia hmangin si phurh an sut nghal. 

Hun tawp nan minute khat chauh a awm tawh a, bench aṭanga luhtir Lee Kang-in hun a inherchhuak - kum 19 mi attacking midfielder hian an goal hnihna a rawn khung a, Valladolid tan chhanletna hun a awm tawh lo. Lee hi European football-a player ngaihven hlawh ber pawl a ni mek a, kum 2022 thleng contract-a neihna Valencia-ah hian a contract a pawtsei duh lo nia sawi a ni - a contract-ah hian euro maktaduai 80-a leichhuah theih a nih thu a inziak nia sawi a awm bawk. 

Valencia hian hnehna an chan avangin Champions League chu beiseiawm tawh chiah lo mah se Europa League beiseina erawh a la nung reng a, table-ah pariatna an ni mek. Spanish club Valencia-in coach Albert Celades an ban hnua hnehna an chan vawi khatna a ni a, season thara European foootball khelh an duh chuan match thum khelh tur hmabak an la neihah tlawm a thiang lo ang - coach lailawk Voro hnuaiah match thum khel tawhin vawi khat an chak a, vawi khat an tlawm a, vawi khat an khingpui an inhnehtawkpui.