Madrid Open khel tur Nadal

Rafael Nadal chu a hliam a dam tawh, kar leh aṭanga khelh tur Madrid Open-ah a inlan dawn. Tournament a khelh tur thu hi tun hnai khan a tichiang a, clay court inelna lian French Open atan inbuatsaihna a nei hman dawn tihna a ni.

Grand Slam vawi 21 champion tawh Nadal chuan, "Kar hmasa aṭang khan training ka zawm tawh, duhthusam chu la ni chiah lo mah se mahni ram ngeia tournament khelh chu a chakawm.

"Ka theihtawp ka chhuah dawn a, Madrid khawpuiah kan inhmu dawn nia," a ti. A khel bawr hliam vangin kar li a chawl a, tunah chuan a inkhelh thiamna hmun clay court-ah ngei a lo kir leh tawh dawn.

Roger Federer erawh a la chawl rei dawn. A khup hliam vangin a chawl mek a, grass court inelna lian Wimbledon khelh tum viau mah se a khel dawn lo niin a lang. Tuna thu thar berah chuan Swiss Indoors a khel dawn tih a ni.

Switzerland rama tournament buatsaihtute hian Federer inlan tur thu hi an puang tawh, inelna hi October thlaa khelh tur daih a ni a, hei vang hian Grand Slam vawi 20 champion tawh hi a la chawl rei dawn tih a hriat theih.