Ukrainian Premier League titawp

Russia-in Ukraine a run chuan football khawvelah pawh nghawng a nei zel a, tun season atan Ukrainian Premier League chu khelh chhunzawm loh tura tihtawp a ni.

December 12, 2021-a thlasik chawlh an neih hnuah UPL hi khelh chhunzawm a ni leh tawh lo a, UPL chuan, "February 24, 2022-a league table chu rin tlang tur a ni a, champion an awm lo ang," an ti.

Shakhtar Donetsk chuan match 18 an khelh tawhah table chung ber an luah mek a, an hnuai chiahah hian Dynamo Kyiv an awm - khelh zat inangah point hnihin Shakhtar hi an phak lo.

Season thara European football khel tur chu table-a dinhmun angin kaltlangpui a nih hmel a, mahse, Ukrainian Association of Football (UAF) chuan UPL thutlukna hi a pawmsak ve leh phawt a ngai dawn a ni.

UPL thuchhuahah hian relegation kaltlangpui dan tur tarlan a ni lem lo a, hetihrual hian league dinhmun leh season thar khelh ṭan hun tur ngaihtuah tur pawl din a nih thu an sawi thung.

Russia leh Ukraine indo hian eng ang takin nge infiamna khawvel a nghawng zel dawn a hriat loh a, Shakhtar Donetsk leh Dynamo Kyiv te chuan indona avanga tuartute chhawmdawl nan charity match khelin Europe an fang mek.

Charity match hmingah hian 'Match for Peace! Let's stop the War!' tih chu an hmang.