Titans tan Rashid Khan a ropui

Gujarat Titans-in Nilaini zan Indian Premier League-ah Sunrisers Hyderabad wicket rukin an hneh a, hnehna an chan theih nan over tawp berah Rashid Khan-a'n six runs vawi thum a vaw chhuak.

Wankhede Stadium-ah Gujarat-in vawm hmasak an thlang. Sunrisers tan opener Abhishek Sharma-a'n 65 runs a vaw chhuak a, Aiden Markram-a'n half century (56 runs) siam bawkin over 20-ah 195/6 runs teuhmeuh an siam.

Titans opener Wrid-dhiman Saha-a'n ball 38 lekah 68 runs a siam a, Shubman Gill erawhin 22 runs siam turin ball 24 a mamawh. Over 18 zawhah Gujarat hian 161/5 runs an siam a, chak turin 35 runs an la mamawh.

Over 19-naah Rahul Tewatia-a'n four leh six vawi khat ve ve hlap chhuak mah se run thum dang chauh an siam avangin over tawp berah chak turin 22 runs siam a la ngai - thil theih loh tluk a ni.

Mahse, Tewatia hian Marco Jansen ball vawm hmasa ber chu six a vuaksak a, run khat siam zuiin Rashid Khan kutah mawhphurhna a tla. Afghanistan captain hlui Rashid Khan hian ball li a hmachhawn zinga vawi thum chu six runs siam nan a hmang a, over 20-naah 199/5 runs siamin Gujarat-in hnehna an chang.

Zanin dar 7:30 hian Punjab Kings leh Lucknow Super Giants te an inkhel ang. Punjab hian match riat aṭangin point riat an hmu tawh a, Lucknow hian point 10 an hmu tawh thung. IPL-ah hian vawi khat chak zelah point hnih an hmu a ni.