Boro-in Premier League khelh tum

Premier League-a mikhual lo tak Middlesbrough-in season tharah English top flight league khelh ngei an tum a, Nilaini zan khan Championship match-ah Cardiff City chu 2-0 in an hneh.

Riverside Stadium-a inkhelah Boro tan Marcus Tavernier leh Riley McGree te chuan goal khat ve ve an khung a, mikhual team Cardiff-in a chhanletna tur an neih loh avangin Boro an chak.

Chris Wilder enkawlna hnuaia khel Boro hian automatic promotion erawh an beisei thei tawh lo a, tuna an beisei chu playoff kaltlanga Premier League khelh a ni.

Championship-ah table chung lam luahtu pahnih chu Premier League khel turin automatic-in an tling ṭhin a, pathumna aṭanga paruknaten playoff hmangin hmun ruak dang an inchuh ṭhin thung.

Boro hi table-ah pasarihna an ni mek a, Wilder-a club hlui, parukna dinhmun luah mek Sheffield United chu point hnih chiahin an phak lo mek - club pahnih hian match hnih bak khelh tur an nei tawh lo.

Club pahnih inum boruak tingaihnawmtu pakhat chu Wilder a ni - kum 54 mi coach hian professional footballer a niha a club hmasa ber Sheffield hi kum 2016 khan coach ni turin a zawm.

Hetihlaia League One club hi Championship khel turin a kaipui a, season khat Championship a khelhpui hnuah Premier League a hruai kai. Mahse, "Ngaihdamna tlemna hmun," tia an sawi ṭhin football-in a chungah zah a ngai reng bik lo.

March 2021 khan Premier League table mawnga an awm avangin Sheffield nen an inṭha ṭhen a, November 2021 khan Boro hian Neil Warnock thlak turin an lalut.

Boro-ah danglamna a thlen nghal a, December thlaah phei chuan league match nga an khelhah vawi li hnehna a chanpui a, vawi khat draw result a nei - manager of the month-ah thlan a ni.

Mahse, tun thla league match-ah an talbuai leh deuh a, April 2-a Peterborough United (4-0) an sawp hnuah league match nga chhung a zawnin an chak zo lo - vawi thum an tlawm a, vawi hnih draw result an nei.

Boro fan-te beisei a bo hman a, mahse, Cardiff laka an result hmangin an inchawi nung leh ta - Sheffield tlanpela playoff an khel a nih ngat chuan Wilder-a thawnthu hian English media titi a luah hneh leh khawp ang.