Fury vs Ngannou: Nakkumah kan hmu dawn?

Tyson Fury-a'n Dillian Whyte a knockout hnu lawkah boxing a chawlhsan tur thu a puang a, UFC heavyweight champion Francis Ngannou chuan Tyson Fury nen nakkumah an inhnek a rin thu a sawi ve leh ta!

Ngannou chuan, "Kan pahnihin he fight hi thleng ngei se kan duh a, chu chu thil chiang sa a ni - kan inzah tawn em em bawk," a ti a, heavyweight boxer nen an inhnek ngei hmel hle.

Kum 33 mi Fury hian inhnek a chawlhsan tur thu sawi mah se format danga inhnek chungchang erawh a sawi lang lo a, MMA lamah fight a hmachhawn dawn nge, boxing-ah bawk a kir dawn, tih chu tunah hriat theih a la ni lo.

Cameroonian fighter Ngannou chuan, "Nakkumah kan in fight ka ring. A thlen ngei ka beisei a, inbiakremna a ni mai kan mamawh - kan tihfel thuai ka ring tlat," a ti a, fans tam takin fighter ropui pahnih in fight hmuh châkin an ring an fân nghal.

Beiseina
Kum 35 mi Ngannou hi a khup hliam zai vangin a chawl mek a, December thleng chu a inlan thei dawn lo - UFC-a a contract neih lai hi kuminah a tawp dawn bawk a, free agent a ni dawn.

Ngannou hian UFC aṭanga harsatna awm miah loin a duh chuan Fury-a team-te hi indawrna a neihpui thei dawn tihna a ni a, UFC-ah contract thar a ziak dawn a nih chuan Fury fight phalsakna tel ngei turin a duh bawk.

Vawi 20 fight a hmachhawna vawi 17 chak thei Ngannou chuan, "Contract thar ka ziak dawn a nih chuan Tyson Fury nena kan fight tur phalsakna contract-ah kan ziak tel tur a ni a, a bak duhthlan tur a awm lo," a ti a, Fury hmachhawn a tum ruh hle.

Ngannou chuan sawi zawmin, "UFC hi an ṭha a, an hnuaia fight hmachhawn pawh ka duh. Fury nena kan inhmachhawn hi a tawpna tur a ni dawn lo a, Jon Jones leh Stipe Miocic te pawh an la awm a, UFC-ah hian fight lian tak tak hmachhawn ka la duh a ni," a ti.

Boxing & MMA
Ngannou chuan, "Fury nen kan inhnek a nih chuan boxing leh MMA chawhpawlh, boxer-a nihna anga a tana harsa ve deuh turte pawh ngaihtuah a ngai mai thei.

"MMA glove bun chunga ke lawnga in fight te pawh a ni thei a, sawi theih engmah a la awm lo. Mahse, ka fight leh tur hmasa ber hi Fury a nihna chance 70% a awm a, ama lam aṭang chuan 90% a ni hial ang," a ti.

Whyte a hneh hnua Fury-a'n chawlh a sawi rik khan a nupui Paris chuan, "A ṭhatzia pholang turin tih leh tur chuang a nei tawh lo a, a chawlh a hun tawh a ni. Tih tur la nei ni se, 'Tyson, ti leh rawh,' ka ti ngei ang. Mahse, engmah tih a mamawh tawh lo - a lo kir dawn a nih chuan unification fight atan chauh a ni ang," tiin a lo sawi tawh.

British boxer Anthony Joshua chuan a kawnghren hloh tawh neih let tumin, tun nipuiah WBA, IBF leh WBO champion Oleksandr Usyk a hnek nawn ngei a rinawm a, Fury hian he inhneka chak zawk nge Ngannou hi hmachhawn leh hmasak a duh ang, tih chu rin thiam a harsa rih.