Hun ka mamawh ang - Marin

Carolina Marin chun hun rei tak chhung inkhel loa an awm tak avangin ngai awh leh tur chuan hun a mamawh tur thu a sawi. Covid-19 vangin March thlatira khelh All England Championship hnuah inelna a la awm leh lo.

Coronavirus leng lo se chuan tunah hian Marin hi Tokyo Olympic-ah gold medal a kawl lai humhim tumin a inlan mek ang, hripui vang hian infiamna khawmpui lian hi nakkum atan sawn a ni thung. Marin chuan, "Tournament khel thei lo mah ila inah training ṭha takin ka nei reng tho, hriselna bakah fitness pawh a ṭha viau. Amaherawhchu tournament khelh loh chuan mahni dinhmun tak hi hriat thiam a har ṭhin.

"Training neih ringawt a tawk lo a, tun hma lama ṭha taka ka khelh anga khel chhuak leh tur chuan hun eng emaw ti chhung ka mamawh dawn a ni, hun pawh rei lote chhungin a inherliam ve leh mai chu ka ring," a ti. Spanish nula Marin hi Asian badminton player ṭha leh ropui tak tak kara European player rawn chawr chhuak a ni a, badminton huangah chuan hlawhtlinna sang awm thei ang chu a chang tawh. World champion a nih bakah Rio Olympic-ah khan gold medal a vaw chhuak.