Zanin dar 7:30-ah MPL Under 18 Final FC Venghnuai Vs Chhinga Veng FC

Mizoram Premier League Under 18 final chu zanin dar 7:30 hian Lammualah vawi hnih champion tawh Chhinga Veng FC leh nomawi la chawi lo FC Venghnuai ten an khel dawn. Ṭantu nei ṭha pahnih inkhel hi a hmuhnawm ang.

A hmuhnawm
Semifinal-ah FC Venghnuaiin league round-a hneh tawh loh Chanmari FC lakah phuba an la a, 3-0 in an sawp. Ningani zan inkhelah Venghnuai tan RM Zothansanga, T. Malsawmzuala leh Lalchhanchhuaha ten goal an khung a, an khel ṭha hle.

Venghnuai coach Lalrindika Hmar chuan, "League round-ah khan midfield-ah kan hneh lo a, semifinal-ah erawh kan chak lohna lai kan thuam chak a, midfield-ah kan dang chat. Chanmari hneha final kan lut hi kan lawm hle," tiin Vanglaini a hrilh.

Chhinga Veng leh Police inkhelah thilmak a thleng leh teuh hle. Chhingcows hian Laltluangliana, Lalrinpuia leh Vanlalfakawma te hmangin goal thum khung hmasa mah se Police-in Lalbiakmuana goal hnih leh minute 86-naa JM Remlala goal hmangin siphurh an sut zo.

Coach H. Lalremruata hote an talbuai a, Police lakah chak lo nawn thei dinhmunah an ding. Amaherawhchu extra time-ah Chhinga Veng an insiam ṭha a, Rinpuia'n goal hnihna a khung bakah Aron Vanlalrinchhana leh Lalnunzira Sailo ten an khung belh bawk.

Final chu
Chhinga Veng hian MPL Under 18-ah tuna Venghnuai coach Rindika Hmar hi an chhawr tawh a, Remruata nen an thawk dun. Coach ṭha pahnih hi an inhrechiang a, final hmuhnawmna a belhchhah ang.

FC Venghnuai coach Rindika Hmar chuan, "Kan hun a inher chhuakah kan ngai a, kan champion ngei ka beisei. Chutihrualin kan khingpui tur Chhinga Veng hi team ṭha ber an ni a, league round-ah pawh kan hneh lo. Final-ah a danglam ka beisei," tiin Vanglaini a hrilh.

Chhinga Veng hian league round-ah Venghnuai hi 2-1 in an hneh. Coach Remruata chuan, "Football-ah chuan engpawh a thleng thei. Police lakah pawh kan ṭha zawk a, vanduai ṭum chu ni se chak lo thei kan ni. Final-ah pawh eng pawh a thleng thei," tiin a sawi. Chhingcows hi head coach Lalthanzama Vanchhawng leh coach Remruata ten an kaihruai a ni.

Semifinal - April 28, Ningani
Chanmari FC 0 - 3 FC Venghnuai
FCV : RM Zothansanga 31'; T. Malsawmzuala 62'; Lalchhanchhuaha 71'
Chhinga Veng FC 6 - 3 (a.e.t) Mizoram Police
CVFC : Laltluangliana 4'; Lalrinpuia 36', 101"; Vanlalfakawma 52'; Aron Vanlalrinchhana 111'; Lalnunzira Sailo 118'
MPFC : Lalbiakmuana 55', 64'; JM Remlala 86'
Final - Zanin Inkhel Tur
FC Venghnuai 7:30 PM Chhinga Veng FC