Liverpool-ah Klopp a cham zel dawn
Premier League champion tuma Manchester City nena inel mek Liverpool chuan an manager Jurgen Klopp chu kum hnih dang atan an chelh a, German coach hian kum 2026 thleng cham turin contract thar a ziak.
October 2015-a Liverpool zawmtu Klopp hi a contract neih lai chu 2024-a tawp tur a ni a, March thla khan a contract zawh hunah chawlh lak a mamawh tur thu a sawi.
Mahse, German coach hian Anfield-a cham a thlang leh ta zawk a, a rual hian assistant manager pahnih Pep Lijnders leh Peter Krawietz te pawhin an contract an pawtsei ve bawk.
Klopp chuan, "Club neituten contract thar min zawrh khan ngaihtuahna ka seng a, he club coach ni zel tur hian thathona leh phurna ka nei em, tih ka in en a, chhanna nei turin ka nghah rei a ngai lo - he hmun hi ka hmangaih a, nuam ka ti a ni," a ti.
Beidawnna aiah beiseina
Kum 54 mi Klopp hian Liverpool a enkawl tirh khan, "Beiseina reng nei lote chu beiseina kan siamsak leh dawn a ni," tiin a sawi a, kum 2022 a herchhuah meuh chuan Premier League, League Cup, Champions League, UEFA Super Cup leh FIFA Club World Cup-ah an champion vek.
Reds hian tun season-a League Cup nomawi an chawi hnuin FA Cup final an lut a, Champions League semifinal first leg-ah 2-0 in Villarreal an hneh a, Premier League-ah point khat chiahin City an phak lo mek.
English football-a thil la thleng ngai lo, quadruple champion ni turin Liverpool-in beiseina an nei mek tihna a ni - vawiin tlai dar 5:00 hian league-ah Newcastle United an lenchilh dawn.
December thla tawp lama Leicester City an ngam loh hnuah khan league-ah tlawm an nei leh tawh lo a, chutihrual chuan an lenchilh tur Magpies hi an league match hnuhnung paliah an chak vek tih hriat tel sak a ṭha.
Hmelṭha nunrawng!
Klopp-a'n a contract thar ziah chhan langsar tak chu a nupui Ulla a nih thu a sawi a, a tira Reds a zawm chhan pawh kha a nupuiin Liverpool thlang tura a tih vang a ni - a nupui a dah pawimawh thiam hle.
Borussia Dortmund boss hlui chuan, "Ka nuna contract pawimawh ber chu ka nupui Ulla nen kan ziak. Chokaa kan ṭhut dun laiin kan nu chuan, 'Kum 2024-a chhuak tur chuan ka in suangtuah thiam lo,' a ti a, chu chu a bul ṭanna a ni," a ti.
Man City boss Pep Guardiola-a'n, "An ninawm takzet a ni," tiin nomawi chawi an tumna apianga lo lang ve zel Liverpool a nin thu a lo sawi tawh a, Klopp-a'n rei zawk atana contract a pawtsei tih hriat hi nuam a ti lo ang.
City hian zanin dar 10:00-ah tlak hlau Leeds United an lenchilh dawn a, Pep-a naute tan point hloh theihna tur team an ni - an chetsual chang ran Liverpool an awm tih an hria ang a, City tan tlawm a thiang lo.
Kawng awlsam a ni lo
City hian Thawhlehni zan khan Champions League semifinal first leg an khel a, Real Madrid lakah 4-3 in chak mahse thin thiin hun an hmang hman lo - an chau ang tih a chiang.
Pep-a naute hian Leeds zawhah, May 4 zan khian Real hi an lenchilh leh dawn a, an dinhmun a la chian loh avangin Pep-a'n Leeds lakah player ṭha a hahdamtir nual a nih pawhin a mak lo ang.
Hei tak hi Liverpool tan chance ṭha a ni thei - Reds hian Thawhlehni zanah Champions League match khelh tur an nei ve nghal a, mahse, Villarreal lakah 2-0 a an chak tawh avangin City ai chuan rilru a hahdam ang.
Merseyside club hian Tottenham Hotspur an la hmachhawn dawn bawk tih erawh hriat tel a ṭha a, league match hautak karah FA Cup final khelh tur a la awm dawn bawk - a tawi zawnga sawi chuan team pahnih tan chetsualna theih a la ni.