United tan Ronaldo bawk

Manchester United chuan Ningani zan khan Chelsea an mikhual a, 1-1 in an inhnehtawk. Old Trafford-ah Blues tan Marcos Alonso-a'n minute 60-naah mawi zetin a volley goal a, minute hnih hnuah Cristiano Ronaldo-a'n ṭha zetin siphurh a sut.

Thomas Tuchel-a hoten inkhel an thunun a, goal chance pawh an insiam hnem. Man United keeper David de Gea a langsar a, Spanish keeper hian Kai Havertz leh N'Golo Kante goal khung tur ṭha zetin a dansak a, Alonso goal khung tur erawh dan rual a ni lo.

Ralf Rangnick-a hote Arsenal laka 3-1 a an mualpho hnuah chak lo thei dinhmunah an ding a, player ṭha bik Ronaldo-a'n danglamna a thlen. Portuguese forward hian Nemanja Matic hnen aṭanga a ball hmuh chu rilru fim taka la thlain angle zim tak aṭangin kawh zetin a pet goal.

Blues hian khualmuala match hnuhnung pariatah hnehna an chang a, match kua an chak zawn thei lo hi mak an ti ang. Tuchel-a hote hian point thum hmuhna remchang an bawhpelh avangin season thara Champions League khel turin match nga khelh hmabak aṭangin point sarih hmuh a la ṭul.

Chelsea hian Pathianni zan dar 6:30 hian tla thei dinhmuna ding Everton an lenchilh dawn a, Manchester United erawhin May 2, Thawhṭanni zanah Brentford an mikhual thung ang.