Sama Hnamte a thi

Mizo footballer langsar ber zinga mi Sama Hnamte chu nimin khan thin ṭha lo vangin a thi a, vawiin chhun dar 12:00 hian a chenna in, Kanan Vengah an vui ang.

Sama Hnamte hian Mizoram chu kum 2002 khan Shillong-a neih National Sub Junior Championship-ah pahnihna a nihpui a, kum 2003 khan Aizawlah champion puiin best player-a thlan a ni. Mizoramin AIFF hnuaia inelna an champion hmasak ber ṭum hian Sama hian vice captain hna a chelh.

Mizo footballer zinga talent ṭha ber zinga mi Sama Hnamte hi India Sub Junior Team-ah thlan a ni a, kum 2004 khan England leh Bangladesh-ah training neiin an zin. Japan-in kum 2004-a Asian Football Confederation Sub Junior at hlen khan Sama Hnamte hi India aiawhin a tel bawk.

Inkhelh thiam vangin Sama Hnamte hian kum 2004 khan Ministry of Human Resource Development hnen aṭangin National Child Award for Exceptional Achievement chawimawina a dawng.

Sama Hnamte hian AIFF hnuaia age group inelnaah Mizoram tan vawi eng emaw zat a feh chhuak a. Senior level-ah pawh Mizoram tan Santosh Trophy, National Games, Dr TAo NE Football Tournament, NE Sports Festival leh Capt NM Gupta Football Tournament-ah te a khel tawh a ni.

Talent nei ṭha bik Sama Hnamte hi goalkeeper tih loah chuan position hrang hrangah a khel thei a, khawi position-ah pawh awm se a awmna aṭangin an goal bawh a na zel. Mizo player ṭha rual awm khawmna Mizoram Police-ah Sama Hnamte hi a langsar ṭhin hle.