Mbappe nen kan cham ang - Pochettino

Paris St-Germain manager Mauricio Pochettino chuan zawhna chhangin, season tharah amah leh star player Kylian Mbappe chu PSG-ah an awm chhunzawm tur thu a sawi a, chutih rualin thil dang pawh thleng thei a la nih thu a sawi tel bawk.

Champions League lama an chet ṭhat loh avangin PSG fans an lungawi lo a, kar hmasa lawka Ligue 1 champion an nihna pawh an lawm tur angin an lawm tawk lo, an champion hnu lawkah fans tam zawkin stadium an chhuahsan hial.

France striker Mbappe pawhin tun season tawp thleng daih bak contract a nei tawh lo, a pawtsei lo a nih chuan nipui bazar inhawn hunah a duh zawng club a zawm thei dawn, a club khelh mekna nen hian inremna an la nei thei lo.

Mbappe nen hian season tharah Parc des Princes-ah in awm chhunzawm dawn em? tih zawhna chhangin PSG manager Poch chuan, "Awm ang tih hi 100%-in a chiang," tiin a sawi a, cham chhunzawm ngei a duh.

Argentine manager chuan sawi chhunzawm in, "Ka thusawi hi tun dinhmuna ka rilrua awm leh ka ngaihdan a ni. Tun dinhmun kan sawi a ni mai a, nakin hun erawh sawi vek theih erawh a ni bik chuang lo.

"Football-ah chuan thil eng pawh thleng thei a ni, eng nge lo thleng dawn tih chu ka sawi lawk thei lo. Zawhna erawh tun dinhmun leh boruak mila chhan hi ka tih tur a ni ve bawk," tiin a sawi a, a club enkawl lai chu tun aia sang thlen pui a tum.

Ligue 1-ah champion chiang viau mah se PSG hian nomawi dang an chawi dawn lo. Arab sum hmanga siam len an nih hnuah hlawhtlinna hrang hrang an chang tawh a, an tan chuan league chauh hi lungawi na tur a ni lo.

Chutih rualin, season hmasa khan Ligue 1 nomawi hi an chawi phak lo. Kuminah Lille hnen aṭangin league title an la let thei a, European football inelna sanga hlawhtling tur erawh chuan an nghah leh rih a la ngai.