Aizawl FC-in I League an khel zel dawn

Aizawl FC chuan Ningani zan I League inkhelah Indian Arrows 2-1 in an hneh a, Mizo club hi a him chinah awmin an relegate thei tawh lo. Inkhel dangah Sudeva Delhi-in Real Kashmir 2-1 in an hneh a, Sudeva chakna leh himna goal hi Mizo tlangval Vanlalzuidika Chhakchhuak khung a ni.

Naihati Stadium-a inkhelah Indian Arrows-in Taison Singh Loitongbam hmangin minute 41-naah goal an khung hmasa zawk. Goal hmahruai luh theih nan wing back Sayan Das chuan vei lam aṭanga lalutin box chhunga tlan lut PS Gogoi tan a pe a, Arrows forward hian rilru fim takin fing takin a cross a, goal ruakah Taison Singh-a'n a khung.

Minute thum hnuah Aizawl FC-in Asier Pierrick Dipanda Dicka hmangin siphurh an sut a, Dicka hian Willis Plaza nen wall pass-in Arrows tlarhnung an ṭhiat a, Cameroonian striker hian keeper bum lehin a pet goal.

Aizawl FC-in team ṭha zawk an ni tih an lantir zui a, defender Bakhtior Kalandarov ball pet chhuah chu forward David Lalhlansanga'n lalutin cool zetin goal kilah a khung. Goal dang luh belh tawh loin Mizo club 2-1 in an chak.

I League relegation stage khel team paruk aṭangin pakhat an relegate dawn. Aizawl FC leh Sudeva Delhi te an him tawh a, Indian Arrows an relegate thei lo. Tun dinhmunah Trau, Real Kashmir leh Kenkre te tla thei dinhmunah an la ding.