Leicester leh Roma an inhnehtawk

Europa Conference League semifinal-ah Leicester City leh AS Roma an intawng a, King Power Stadium-a inkhelah hian 1-1 in an inhnehtawk - Roma khelmualah an la intawng leh dawn a, Italian club dinhmun a ṭha rih zawk.

Roma tan hian captain Lorenzo Pellegrini chuan minute 15-na lekah goal hmahruai a khung a, Jose Mourinho-a team hian he goal hi an chakpui mai dawn niin a lang hman.

Mahse, Foxes-in ngaihdan dang an nei - minute 67-naah Harvey Barnes-a'n ṭha zeta ball a lakluh hnuah Ademola Lookman tan a cross a, Nigerian winger-in pet a tum chu a hmaa ding Gianluca Mancini chuan lo khawih khalh mah se an lamah a ti lut!

Foxes tan substitute bench aṭanga luhtir Kelechi Iheanacho chuan goal khungna remchang nei mah se a chhawr lo a, Roma keeper Rui Patricio chuan ṭha zetin a dansak - hei bakah hian hnai set sawt aṭangin a tauh over.

Semifinal inkhel dangah Feyenoord chuan mikhual chungah ṭhat chhuah duh loin, Marseille chu 3-2 in an hneh - Dutch club Feyenoord tan Cyriel Dessers chuan goal hnih a khung bakah Luis Sinisterra chuan goal khat a thawh bawk.

Feyenoord hian Nigerian forward Dessers leh Colombian winger Sinisterra hmangin 2-0 in hma an hruai hman a, mahse, Marseille-in Senegal international Bamba Dieng leh Brazil international Gerson hmangin an chhanglet.

Mahse, French club Marseille an phur tak tak hmain Dessers chuan goal khat a khung leh a, Feyenoord a chakpui.

Genk aṭanga loan-a an hawh Dessers hian tun season ECL-a goal 10 a khungna a ni a, European football-ah season khata heti zat goal khung thei Feyenoord player zingah an la awm ngai lo.

Europa Conference League Semifinal
First Leg
April 28, Ningani Zan
Leicester City 1 - 1 Roma
LEI: Gianluca Mancini 67' (OG)
ROM: Lorenzo Pellegrini 15'

Feyenoord 3 - 2 Marseille
FEY: Cyriel Dessers 18', 46'; Luis Sinisterra 20'
MAR: Bamba Dieng 28'; Gerson 40'

Second Leg
May 5, Ningani Zan
Marseille 12:30 AM Feyenoord
AS Roma 12:30 AM Leicester City