Champion turin Real an inpeih

La Liga-ah Real Madrid-in match nga khelh la ngai mah se, champion tura an mamawh zat chu point khat chauh a ni - zanin dar 7:45-ah Espanyol an mikhual dawn a, point khat lek pawh an hmuh chuan an champion ang.

Madrid khawpui chu Real champion lawm tur hian an inbuatsaih mup mup tawh a, an khawpui hmun lar tak Cibeles Fountain-a champion lawm tura pungkhawm turin fan-te chuan inpuahchahna an kalpui der tawh - khawpui thuneitu lam pawhin phalna an pe tawh a, nizan aṭang khan traffic lam vel pawh an buaipui ṭan tawh tura ngaih a ni.

Real hian La Liga nomawi chawi ta pawh ni se, May 4 zanah Manchester City nen Champions League semifinal second leg an la khel leh dawn a, hahchawl hman an ni lo.

Champions League match an la neih avang hian fans tam tak chuan champion lawm lutuk an hlauthawng ve thung a, player-te chu an match pawimawh ngaihtuah lek loa champion an lo lawm mai an hlauthawng.

Mahse, Real boss Carlo Ancelotti chuan, "Kan champion phawt chuan kan lawm ang - City nen kan inkhel tur atan min pui thei dawn a ni," a ti a, champion lawm chuan player-ah phur lehzualna a pek theih a beisei.