Suns leh 76ers an tlang

Joel Embiid-a point 33 neih hmangin Philadelphia 76ers chu Toronto Raptors in an hneh a, best of seven series chu 4-2 a lain Eastern Conference semifinal an lut - Miami Heat nen an inhmachhawn ang.

Nimin zing game 6 inkhelah 76ers tan James Harden a langsar bawk, mual chhunga minute 42 hun a hman chhungin point neiin assist vawi 15 zet a nei tel bawk, hnehna an chan theih nan a thawh hlawk hle.

76ers hian series tir lamah a zawnin vawi thun hnehna an chang, chumi hnuah ṭum hnih chak lo mah se game 6-ah chuan an chungnung hle. Harden-a'n a lo sawilawk tawh ang ngeiin game 7 chu khelh a ngai ta lo.

Regular season bika team ṭha bera chhal ngam - Phoenix Suns pawh an tlang. Suns hian 4-2 a series la turin New Orleans Pelicans chu 115-109 in an hneh a, semifinal-ah chuan Dallas Mavericks nen an inhmachhawn ang.

Suns thiampuipa Chris Paul-a'n point 33 a nei a, match dang ang bawkin a ṭangkai leh hle. Malpui hliam dam hlim Devin Booker pawhin point 13 a nei, a ṭhat dan berin la khel nghal lo mah se semifinal khel tur Suns tan chanchin lawmawm a ni.

NBA Eastern Confe-rence lamah Miami Heat leh 76ers an intum dawn tih a chiang a, semifinal lehlamah Mialwaukee Bucks leh Boston Celtics an intum thung a, a chak zawk hian conference final an khel leh ang.

Western Conference lamah Suns leh Dallas an insut bakah, Golden State Warriors an tlang tawh. Golden State hian Memphis Grizzlies leh Minnesota Timberwolves inkhela chak zawk an tum ang, Memphis hian 3-2 in hma an hruai mek.