Rangers tan beisei a la bo lo

Europa League semifinal first leg-ah Rangers an tlawm a, RB Leipzig lakah 1-0 in an chak lo - inkhela goal awmchhun hi Angelino khung a ni a, si phur chungin Rangers an haw.

Scottish club-in mahni mualah second leg an khelh leh dawn avangin beisei erawh a bo thiang lo a, Ibrox-ah fans sing tel puihna nen thawnthu her danglam theih an beisei ang.

Rangers manager Giovanni van Bronckhorst chuan, "1-0 leka chak loh chu kan thlak danglam thei mai ang," a ti a, German club ṭha lehthal a, final lut turin beiseina a nei.

An thamral
Leipzig khelmualah Rangers-in beisei angin an khel chhuak thei lo a, first half-ah Leipzig tan forward chhuanvawr Christopher Nkunku a langsar a, Konrad Laimer chuan a chance neih duhawm a hlah bawk.

Nkunku chance duhawm Rangers keeper Allan McGregor-a'n a dansak hmante chu Scottish club ṭantute thin phu tirangtu a ni a, tun season-a goal 30 khung tawh Nkunku a vanneih zan a ni lo niin a lang.

Nkunku-a'n chance dang a nei zui a, a chhawr chuang lo. John Lundstram tlan pel a, McGregor a bum hnuah a khung ngei dawn niin lang mah se a balance a hloh a, awlsam taka khung tura lang a khung thei lo.

A tawpah Leipzig
RB Leipzig-in 71% ball an chang a, vawi 10 shot an nei a, vawi li ngawt chu target-ah a kal - team pahnih an inthlau hret tih a lang a, Rangers-in chance nei lo an ni bik lo.

Second half-a insiamṭha Rangers hian point an hlawh chhuak ngei dawn niin a lang hman a, mahse, hun tawp nan minute nga chauh a awm tawh tihah football nunrawnna chu tem tirin an awm.

Manchester City player hlui Angelino chuan minute 85-naah mawi zetin a volley a, a goal - Rangers an hawihai a, Leipzig an chak. May 5 zanah an intawng leh dawn tih chu Scottish club inhnemna a ni.

Game hautak em em a ni. A tlangpui thuin Rangers hi khatiang taka tawlh hnung khan an khel ngai lo. Zaninah erawh an ding phui ṭha bawk si a, khatiang khelhpui kha chu a hautak lam hret a ni.
Second half-ah vawi thum emaw vawi li vel lai chu chance duhawm kan nei a, a harsa ber aṭangin kan khung ta zawk. Angelino khan vawi 10 vel shot se, vawi hnih vel chu a khung ang, tih tur chauh a ni a, kan vannei ve bawk. Match lehah chuan Rangers tan tawm tlat a theih dawn lo a, keini tan chu chu malsawmna a ni thei. - Domenico Tedesco, RB Leipzig head coach

Kan thawhhona a ṭha a, first half kha chu chance an neih lohna tura dan beh kha kan tum a ni ber a, second half angin ball kan ken khan kan inringtawk tlat lo. Hun tawp dawn tawha goal chhuah hi chu a nuam ngai lo. Mahse, ka nauten an khel ṭha a, kan inkhelh leh hunah kan mualah kan khel dawn a, fan-ten kan mamawh phurna min pe ang. - Giovanni van Bronckhorst, Rangers manager

Europa League Semifinal
First Leg
April 28, Ningani Zan
West Ham United 1 - 2 Eintracht
Frankfurt
WHU: Michail Antonio 21'
EIN: Ansgar Knauff 1'; Daichi Kamada 54'
RB Leipzig 1 - 0 Rangers
RBL: Angeliño 85'

Second Leg
May 5, Zirtawpni Zan
Rangers 12:30 AM RB Leipzig
Eintracht Frankfurt 12:30 AM West Ham