Foxes laka goal hum thei lo Arsenal

Pierre-Emerick Aubameyang goal chu Arsenal tan point thum hmuh nan a tawk mai dawna a lan laiin Leicester City striker Jamie Vardy-a'n hun tawp dawnah sutin 1-1 in an inhnehtawk. Gunners tan Champions League a hla rih a, point khat sual chhuaktu Foxes erawhin UCL ticket an la hum zel.

Thawhlehni zan Emirates Stadium-a Premier League inkhel hmuhnawmah team pahnih an inkhel tawk a, goal bakah goalkeeper Kasper Schmeichel leh Emiliano Martinez ten hna an thawk ṭha hle.

Leicester City forward Kelechi Iheanacho-a'n a lira kawh zeta a pet chu keeper Martinez chuan a kein a lo dansak hman, a tir aṭangin inkhel boruak a nung nghal. Entu awm lo mah se point thum mamawh an nih avangin boruak pawh a sang.

Minute 21-naah Dani Ceballos ball pek dawngtu Bukayo Saka-a'n box chhungah chiai hauh loin Auba khung turin ṭha zetin a siamsak zui, Gabonese striker tan goal hmahruai khung turin harsatna a awm lo - season kal laia a league goal 20-na a ni.

Gunners tan rawlthar duhawm Saka a hmuhnawm zui, English winger hian Alexandre Lacazette tan ball ṭha bik a pe leh. Lacazette-a'n rang taka vir puiin pet mah se Schmeichel a paltlang zo lo, French striker tauh luh tur pawh Foxes keeper hian a dansak.

Lacazette thlaktu Eddie Nketiah chu James Justin laka a foul vangin hnawhchhuah a ni a, hun tawp lam minute 15 chhung chu tlem zawk ni chunga an khelh a ngai. Hun tawp hma minute ruk chauh awm tawhah Vardy-a'n siphurh a sut a, VAR hmangin a offside em tih endik a nih hnuah goal atan an pawm.

Mikel Arteta nauten a zawnin Southampton, Sheffield United, Norwich City leh Wolves te an hneh thei a, an mikhual Foxes lakah pawh point thum hmuh ngei an beisei, a tawpah erawh red card leh Vardy an ven hmaih zeuh vangin point thum an hmuh tur zinga point hnih an hloh.

Arsenal manager Arteta chuan, "Hnehna chan kan phu hlein ka hria, goal dang khung belh ni ila awlsam taka hnehna chang mai thei tur kan ni. Mahse kan khung belh loh avangin a tawpah point hnih kan hloh, player 10-a khelh a ngai khan thil a ti danglam bawk," a ti.

Chak zo lo mah se Gunners tan lawmna tur a awm, kum 18 mi Saka a hmuhnawm. Saka hian tun season Premier League match 22 a khelh aṭangin a ṭhiante khung tur vawi 12 a siamsak tawh -  Premier League assist ngah lama a tluk loh chu Kevin de Bruyne (19) leh Trent Alexander-Arnold (14) te chauh an ni. Wingback Kieran Tierney a rintlak bawk, Scottish player hian cross hlauhawm tak tak a nei fo, an khingpuite ball chan lai vawi li chhuhsakin goal venhim kawngah pawh a thawhhlawk hle, hliam nei loa a khel zel a nih chuan season tharah rinrawl a ni ang.

Season chanve vel an hman lai kha chuan Leicester City hi Liverpool leh Manchester City te nen an ineltawk ve hle, thlasik chawlh hma deuhin an chesual a, Covid-19 len hnuah pawh an chefuh hleithei ta lo.

Foxes manager Brendan Rodgers chuan, "Point hmuh theih tlem ber kan hmuah ka ngai, a tir aṭangin kan khel ṭha em em a, goal hmaah kan vanduai deuh mai chauh a ni. Chawlhlawk hma deuh khan tihsual kan ngahin hmun awl kan siamsak hnem, a hnu lamah erawh kan insiamṭha zui leh.

"Player pakhata kan tam zawk hnuah kan khel ṭha zual, goal kan nei har kha a pawi a, goal hnihna kan khung hman lo kha a pawi zual," tiin a sawi. Leicester hian league match bikah Arsenal muala an lenluh hnuhnung 23-ah chak ni hmel an hmu lo.

League match 24 khelh tawhah Foxes hian point 59 hmuin palina an ni, an hnuai chiaha awm Manchester United nen an inkarah point li chauh a awm - Rodgers-a naute hi match khatin an khel hnem zawk. An hmabakah Tottenham leh United an la awm dawn a, a hautak dawn tih a chiang.