Mizoram Lockdown (inkharkhip) Ni 109

Arsenal legend David Seaman-a'n English football-a hming a chher tak tak hma khan fourth division-ah Peterborough United tan a khel a, season thum chhunga match 109-a khelh hnuah hmelhriat hlawh ṭanin 1984 khan second division club Birmingham City a zawm. Birmingham hi a season khatnaah a hunlaia league sang ber first division-ah a inhlankaipui a, top division-a season khat a khelhpui hnuah kum 1986 khan Queen Park Rangers a zawm. QPR tan season li a khelh hnuah kum 1990 khan Arsenal a zawm a, a hawikir tawh lo. 

Arsenal-ah hian 2002-03 thleng a khel a, inelna hrang hrangah match 564 zet a inlansak hman! Manchester City chu 2003-04 season khan a zawm leh a, season khat khelin inkhelh a chawlhsan. Kum 56 mi ni ve tawh Seaman hian a career a ṭanna tak chu Leeds United a ni a, mahse English club lar tan hian match a khel hman miah lo. England tana vawi 75 inlan thei keeper hian Arsenal tan season 13 a khelh chhungin Football League First Division (1), Premier League (2), FA Cup (4), League Cup (1), European Cup Winners' Cup (1) leh Community Shield (3) nomawi a chawi hman. Premier League 10 Seasons Awards (1992 - 2002)-ah Domestic Team of the Decade zingah telh a ni a, PFA Team of the Year (1996-97)-ah vawi khat a lang a, kum 1996 khan UEFA European Championship Team of the Tournament-ah a tel bawk.