United-in Wembley Stadium pan dawn?

Manchester United-in Juan Mata leh Marouane Fellaini te goal hmangin Hull City 2-0 in an hneh a, Jose Mourinho-a'n player ṭha a chhawr rah a seng.

Thawhlehni zan Old Traf­ford-a inkhel hi EFL Cup semi­final first leg a ni a, January 26 zanah KC Stadium-ah second leg khelh a ni ang. United leh Tigers te semifinal-a an inhma­chhawn dawn tih hriat rualin Mourinho hote chu rinkai zawk an ni a, goal hniha hma an hruai leh tak avangin Wembley Stadium-a final khel tur hi hun chauhin a dang tawh niin a lang.

Inelna pawimawh
Inelna hlut lama Premier League leh FA Cup hnuaia awm League Cup hi club tam takin player naupang zawk tuai hriam nan an hmang ṭhin. Tun hnuah erawh nomawi chawi a harsat avangin ngaih pawimawh a hlawh chho a, Mourinho pawhin a ngaih pawimawh tih a thusawi bakah a thutlukna hmangin a nemnghet.

Portuguese manager Mou­rinho hian Zlatan Ibrahimovic a chhawr tur thu sawi lawk mah se Swede forward hi damlohna vangin a inlan thei lo. Amaherawhchu United tana inkhel bul ṭantu zingah khawvel player manto ber Paul Pogba, keeper David de Gea, Ander Herrera, Henrikh Mkhitaryan leh captain Wayne Rooney te an awm vek.

United-in kartawpah Liver­pool hmachhawn dawn mah se League Cup an hlam chhiah lo a, veteran midfielder Michael Carrick leh season liam taa player pawimawh Anthony Martial an awltir theih danah an squad a chhah tih a lang bawk.

A goal lo
Manchester-in nung takin bul an ṭan a, table mawngphaha awm Hull City-in goal venhim hna an thawk. Amaherawhchu Mata, Marcus Rashford, Roo­ney, Mikhitaryan, Antonio Valen­cia leh Pogba ten chance ṭha an hlah a, United an vannei lo.

United finishing a ṭha tawk lo a, chutihrualin coach thar Marco Silva hnathawh a lang ve bawk. Hull City hian FA Cup-ah Portuguese manager Silva enkawlna hnuaiah Swansea an hneh a, Old Trafford-ah minute 45 chhung goal an chhuah loh bawk avangin United supporter tan ngaih ṭhat theih a ni lo.

Fellaini 'Hug'
Second half-ah United khel a nung chhunzawm a, Mkhi­ta­ryan-a'n keeper Eldin Jakupovic a hmachhawn hnuah a lak chak hret vangin a ti goal thei lo.

Minute 56-naah erawh goal a lut nge nge a, ding lam aṭanga Valencia ball vawrh luh chu Armenian midfielder Mkhitaryan-a'n a tauh hnuah Mata-a'n harsatna nei loin a tlawh lut. United an vanneih ve bawk avangin Hull tlarhnung dem theih a ni lo.

Khawvel player manto ber Pogba-a'n freekick aṭangin goal ban a pet per a, hemi hnu hian Mourinho-a'n a tih ṭhin dan angin goal venghim turin Fellaini a luhtir. Belgian midfielder hi khelmual chhunga minute 10 chuang hret awmin a ball pass vawi riat a tidik vek a, boruaka ball inchuhnaa a chak vek bakah a goal chance neih chhunah a ti goal bawk.

Belgian midfielder Fellaini hian a goal khung lawm nan manager Jose Mourinho lamah tlan pheiin a va kuah a, Everton nen an inkhelh ṭuma penalty chawitu Fellaini hian amah ring tlattu Portuguese manager chungah a lawm tih a chiang hle.

Portuguese manager Mou­rinho chuan, "Hun harsaah a hnungah ka ding tlat ṭhin tih lantir a duh vang niin ka hria. Goal a khung dawn tih hre lawk lo mah ila goal khung turin ka hrilh a, United supporter hmaa goal a khung kha atan a pawimawh a ni," tiin Fellaini nena an inkuah chungchang a sawi.

Eng nge an sawi?
Hull City manager Marco Silva chuan, "Ni li chiah trai­ning kan la nei a, thil thlak tur tam tak a awm a ni. Ka player-te khelh danah ka lungawi," tiin chak lo mah se a naute a sawisel duh lo.

Manchester United manager Jose Mourinho chuan, "Inkhelh a harsa dawn tih ka hre sa a, goal li emaw goal nga emaw a kan chak ka beisei lo. Goal khat pawhin chak ila, ka lungawi tawk a, 2-0 a chak kha chu a ṭha lehzual a ni. Semifinal a la tawp lo a, Wembley kan thleng lo. Hei vang hian goal hnihna khan pawimawhna lian tak a nei a ni," tiin an chak dana a lawm thu a sawi.

Mourinho chuan, "First half-ah khan ka beisei kan phak lo a, kha aia ṭhaa kan khelh ṭul a ni. Player-te'n ṭha zawka an khelh a ṭul a, kei pawhin kha aia ṭhaa ka thawh a ṭul a, fan pawhin kha aia an ṭan a ngai a ni. Second half-ah hma kan sawn a, mah se tlem te chauhin a ni," tiin hmasawn an mamawh thu a sawi.

Liverpool nena an inkhel tur thlir lawkin Mourinho chuan, "EFL Cup a zo a, tunah chuan Pathianni chauh kan thlir tawh. Mi zawng zawngin inkhel pawimawh an lawm a, Pathianniah inkhel pawimawh chu kan hmachhawn dawn a ni. Inelna hrang hrangah vawi kua kan chak zawn tawh a, vawi 10 chak zawn kan tum a, chumi tur erawh chuan hmasawn kan mamawh," tiin a sawi.

United manager hian Pa­­thiannia Liverpool an hma­chhawn hunah Zlatan Ibra­himovic chu chhawr theih a inbeisei a thu a sawi a, Marcos Rojo erawh a dinhmun a la chian loh thu a sawi thung.