Sawiselna chhangtu FIFA president

Thawhlehnia Zurich khaw­puia FIFA hruaitu ṭhu­khawm ten World Cup-a team tel thei zat 32 aṭanga 48-a tihpun an tih tluk hnu lawkah FIFA chu sum duh vanga thutlukna siamah World Cup-a team tel thei zat tihpun duh lotuten an puh a, FIFA president Gianni Infantino chuan anmahni sawiseltute chhangletin an thutlukna chu sum vang niloin football hmasawnna tur ngaihtuah chunga thutlukna siam an nih thu a sawi.

FIFA president chuan, "Mi an puhna hi thudik lo a ni a, football chauh ngaihtuah chunga thutlukna hi siam kan ni. Eng thutlukna pawh siam ila sum hlawkna chu a awm ngei dawn tih hi thil chiang sa a ni a, football hmasawnna ngaihtuah chungin thutlukna hi kan siam a ni," a ti a, kum 2026 aṭanga team 48 telna tur World Cup-ah hian sum chevel tur zat chu pound tluklehdingawn 5.29 ni tura beisei niin FIFA-in pound maktaduai 521 hlawkna hmu thei tura beisei a ni.

Football Association chuan FIFA hnenah engtiang takin nge ruahmanna thar anga World Cup kalpui a nih dawn tih an zawt tawh a, Infantino chuan team tih pun pawm ngawt mah se a kalpui dan tur chu tam tak duan tur ala awm thuin a chhang. Team tel thei tih pun duh loh zingah Eu­ropean Club Association (ECA) chu a langsar pawl an ni a, FIFA chuan politics takin thutlukna an siam niin an sawi.

Mahse, Infantino chuan, "World Cup hnuhnung ber kha thlir let ula, Costa Rica khan England leh Italy an hnawt chhuak thei a ni. Costa Rica anga team ṭha tak tak World Cup-a la inlan lo hi an awm ngei ang tih ka ring tlat. Team tel an tam vanga World Cup quality tlahniam tura ngaih pawh hi a dik lo a, a quality hi kei chuan a sang sawt turah ka ngai zawk a ni. Ram tam takin World Cup khelhna chance an nei tih in hre chungin hmasawn an tum ang a, grassroots thlengin hmasawnna hmuh tur tam tak a awm ang," a ti.

UEFA secretary general chuan sawi chhunzawmin, "Kan hriat tur chu football hi khawvel game a ni tawh tih hi a ni. Mi zawng zawngin Europe football a sum sen an duh a, engah nge Europe pawn lam pawh kan ngaihtuah tel loh ang," tiin team pun duh lotu ECA hotute a chhanglet.