AFC khingpui tur Minerva Punjab
Minerva Punjab-in I League-a an inlan hmasa berah Chennai City FC khelmualah point khat an hlawh chhuak a, RG Stadium-ah club thar hi fiahin an awm dawn.
Tun season Mizorama I League match hmasa ber chu January 13, Zirtawpni tlai dar 1:30 hian RG Stadium-ah Aizawl FC leh Minerva Punjab ten an khel dawn.
Punjab club hian season liam ta khan Minerva Football Academy hming puin 2nd Division I-League an khel a, final round-ah pahnihna niin champion Dempo point ngain an pha lo. Minerva hi I League khelpha lo tura ngaih an nih hnuah Goan club Sporting Goa, Salgaocar leh Dempo te an inhnuh dawh avangin Warriors (Minerva Punjab sawina) hi AIFF chuan India ram football inelna sang khel turin a hlang tling. Aizawl FC pawh hi tla tawha ngaih an ni a, AIFF lamin an dah lut leh a, AIFF duhsakna dawngtu club pahnih an insu dawn a ni.
Team naupang
Punjab club hian an match hmasa ber starting eleven-ah Under 22 player pali an luhtir a, substitute-ah kum 22 hnuai lam player hi pali awmin pahnih hian bench aṭangin khelmual an rap bawk.
Minerva Punjab coach Surinder Singh chuan, "Kan squad hi team naupang ber kan ni hial ang, mah se kan zam phah lo. Ka player-te hi an nung ṭha a, inkhel turin an phur a, senior player anmahni pui tur an awm bawk avangin eng team pawh kan hneh thei a ni," tiin a naute a rintawk thu Vanglaini palai hnenah a sawi.
Warriors hian ISL club Chennaiyin FC aṭangin Anirudh Thapa, Baoringdao Bodo leh Uttam Rai te a lalut a. Thapa leh Bodo te hian nikum kumtir khan FC Metz's youth academy-ah training an nei a, Minerva match day squad-ah an tel pha lo. Kum 2010-a IMG Soccer Academy, United States-a training nei tawh Uttam Rai erawh match hmasa berah bench aṭangin a lut thung.
Minerva coach Surinder Singh hian Pailan Arrows-ah assistant coach hna a chelh tawh bakah AIFF youth team hrang hrang a enkawl tawh bawk. Punjabi coach Surinder hian I League a enkawl hmasak berah an naupan laia a enkawl tawh Vinit Rai, Nuruddin, Kamalpreet Singh leh Germanpreet Singh te chungah rinna a nghat ngam.
Team chakna
Minerva Punjab hian season liam taa Aizawl FC player zinga goal khung theih vanga langsar Joel Sunday an lalut a, Nigerian forward bakah hian Nigerian pahnih dang an awm bawk.
Sporting Goa-in Aizawl FC an hneh ṭuma hla tak aṭanga goal khungtu defender Loveday Okechukwu chu tlarhnung tichak tura lakluh a ni a, tlarhma tichak turin Nepal club African United Club top scorer Victor Amobi an lalut bawk.
Sunday kawppui Manandeep Singh hi team captain a nih bakah India ram chhungah tawnhriat a nei ṭha hle. Manandeep hian Pailan Arrows, Air India, East Bengal, Rangdajied United, Delhi Dynamos, Kerala Blasters leh Salgaocar tan a khel tawh a, 2012 khan FPAI Young Player of the Year a ni.
Rempuia a tel lo
Aizawla rawn zin Minerva Punjab squad-ah Mizo tlangval Lalrempuia a awm lo a, Warriors coach Surinder Singh chuan, "Player ṭha tak a ni a, tun dinhmunah chuan a fitness duhthusam a la ni lo. Kar hnih te a ral leh chuan kan team-ah player pawimawh a ni thei ang," tiin Vanglaini palai a hrilh.
Minerva Punjab hian Thawhṭanni khan Aizawl an rawn thleng a, ni hnih chhung Lammualah training nei tawhin vawiin hian inelna neihna hmun tur RG Stadium-ah training an nei ang.
Aizawl-a zin Minerva Punjab Squad
J No. Hming
Starting XI Vs Chennai City FC
1 Ravi Kumar GK
22 Kamalpreet Singh (U22) RB
30 Loveday Okechukwu CB
15 Arashpreet Singh CB
5 Gurjinder Kumar DF
7 Nuruddin (U22) RM
8 Vinit Rai Chanling (U22) CM
28 Germanpreet Singh (U22) CM
25 Victor Amobi LM
20 Joel Sunday FW
9 Manandeep Singh (C) FW
Substitutes
3 Arshdeep Singh (U22) GK
4 Ramandeep Singh DF
14 Vishal Kumar DF
11 Simranjeet Singh MF
50 Altamash Sayed (U22) MF
12 Uttam Rai (U22) FW
21 Krishna Pandit (U22) FW
Squad-a tel lo
24 Kamaljit Singh (U22) GK
6 Anirudh Thapa (U22) CM
18 Souvik Das (U22) CM