Sharapova lo kir hun tur a hnai

Maria Sharapova inkhel lai kan hmu leh ngei dawn. World number 1 hlui hian hrem a nih hnua competitive a khelhna hmasa ber atan April thla a khelh tur Stuttgart Grand Prix a nih thu a sawi.

Grand Slam vawi nga champion tawh Sharapova hi meldonium a hmang tih hmuh chhuah a nih avangin kum hnih inkhel thei lo tura hrem a ni a, nikum October thla khan thla 15 chhung atan tih tawi sak a ni.

Kum 29-a upa Sha­rapova hi nikum Aus­tralian Open hnuah a la inkhelh leh loh avangin inelna a hmachhawn leh hunah pawh ranking a nei a nih pawhin a hniam dawn em avangin seeded a ni phak dawn lo - wild card hmangin a khel ang.

Russian nula Shara­pova chuan, "Inelna ka ngainat em em hmunah ka kir leh thei tur hi ka lawm. Stuttgart-ah hian min ṭantu an tam em avangin inkhelh leh hun ka nghakhleh takzet a ni," a ti. Stuttgart-ah hian Sharapova hi kum 2012 aṭanga 2014 chhung khan a zawnin vawi thum a lo champion tawh.

May 22 aṭang khian kumina Grand Slam pahnihna French Open khelh a ni dawn a, clay court tournament hi Sharapova tan hrem a nih hnua a major tour­nament hmasa ber tur a ni bawk ang. Vawi hnih a champion tawhna hmun­ah pawh hian wild card a mamawh tho dawn a ni.