Terry hremna kaltlangpui dawn

Chelsea chuan FA Cup-a Peterborough an hneh ṭuma club captain John Terry red card hmuh chu Football Association hnenah ngaihtuah nawn turin thlen mah se FA chuan Blues dilna hi an hnawl a, English defender red card hmuh chu kaltlangpui tur a nih thu an sawi.

Kum 36-a upa defender hi Peterborough striker Lee Angol laka a professional foul chu he inkhela referee Kevin Friend chuan red card pek nan a hmang a, Chelsea lam chuan hei hi hrethiam loin an khinglet a ni. English defender hremna hi kaltlangpui a nih dawn takah chuan match khat a inlan thei dawn lo a, January 14 zana Leicester City an lenchilh hunah a inlan thei lo ang.

England tana vawi 78 inlan thei defender hian Foxes hmachhawn thei dawn lo mah se Blues hian an tuar lutukin a rinawm hran lo. Terry hian Peterborough a hmachhawn kha October 2016 hnua Blues tan inkhel bul a ṭan leh hmasak ber a ni a, Antonio Conte enkawlna hnuaiah match riat chiah a la khel ve a ni.