Man United-in Schneiderlin hralh dawn

Manchester United chuan Everton-in pound maktaduai 22-a an midfielder Morgan Schneiderlin lakluh an dilna chu an pawm a, he thuziak i chhiar meuh chuan French midfielder hian Merseyside club hi a zawm tawh hial mai thei.

Kum 27-a upa Schneiderlin hi July 2015 khan a hunlaia United boss Louis van Gaal chuan Southampton aṭangin pound maktaduai 25-in a lalut a, Red Devils tan match 47 a inlan tawh. Mahse, United-in Jose Mourinho an lakluh hnuah Saints midfielder hlui hian match riat chiah la khelin Premier League-ah vawi thum chauh a la inlan.

Thawhlehni zana Hull City an hneh hnuah Mourinho chuan,"Executive vice-chair­man Ed Woodward-a'n Morgan chungchang hi min hrilh tawh a, Morgan hi Everton-ah a kal ngei ang. Zaninah hian ka lungngaih rualin ka hlim tel bawk. Morgan hi kan hnenah awmin duhthlan tur tam tak nei ila tih ka duh avangin a kal mai tur hian min ti lungngai a, hetihrual hian inkhelh tam leh team tana player pawimawh nih a duh bawk si avangin Everton a pan tur hi ka lawmpui a ni," tiin a player thlahna thu a sawi der tawh.

Everton hian February 2016-a Lokomotiv Moscow aṭanga pound maktaduai 13.5-a an lei striker Oumar Niasse chu Hull-ah loan-a kaltir an remti tawh bawk a, Charlton Athletic aṭangin kum 19-a upa forward Ademola Lookman chu pound maktaduai 11-in an lalut tawh bawk.

Everton manager Ronald Koeman chuan FA Cup third round-a Leicester City an hneh loh hnuah player lakluh an mamawh thu a lo sawi tawh a, St. Mary's lama a lo kaihhruai tawh Schneiderlin bakah hian May 2015-a pound maktaduai 25-a United zawmtu Memphis Depay chu Goodison Park lamah sengluh theih a inbeisei bawk.