Copa del Rey Las Palmas hneh lotu Atletico an tlang
Atletico Madrid-in Copa del Rey last 16 second leg-ah 2-3 in Las Palmas ngam lo mah se first leg-ah 2-0 a hnehna an lo chan tawh avangin quarterfinal an lut a, inkhel pahnih belhkhawma hnehna an channa zat hi 4-3 a ni.
Madrid khaw club pakhat zawk Real Madrid chuan zanin dar 1:15-ah hian last 16 second leg khel turin Sevilla an lenchilh ve dawn bawk a, inkhel hmasa zawkah 3-0 a hnehna an lo chan tawh avangin Zinedine Zidane-a naute tan a thiam pariat zinga tel turin kawng harsa a awm tawh lo.
Tlawm chunga hnehtu
Atletico Madrid tan kum thara siamtharna changtu Antoine Griezmann bawk a inlar a, French forward hian inkhel ṭan aṭanga minute 49-naah goal hmasa ber a khung. Las Palmas-in Marko Livaja hmangin minute riat hnuah an si phurh an sut a, Palmas hlim authawm pawh a reh fel hmain Angel Correa chuan a vawi hnih nan Atletico hma a hruaipui.
Inkhel hmasa nena belhkhawmin Atletico-in 4-1 in hma an hruai a, mikhual team Las Palmas tan chak beisei ngam chi niin a lang tawh lo. Mahse, La Liga table-a pariatna dinhmun luah mektu club hian huaisen takin an bei let a, minute 89-naah Croatian striker Livaja chuan an goal hnihna khungin Mateo Garcia chuan injury time-ah chakna goal a khung bawk.
Atletico midfielder hlui Quique Setien-a enkawl team hian hnehna chang mah se an harh chhuah a tlai hret a, inkhel hmasa zawkah Diego Simeone-a nauten 2-0 a hnehna an lo chan tawh bawk si avangin chak result hlawh chhuak chungin an tlawm haw ta a ni.
A ṭha lam thlirtu Simeone
Atletico Madrid coach Diego Simeone chuan,"Hnehna chan loh hi chu engtiklai mahin thil nuam a ni ngai lo. Mahse, hnehna kan chan loh ringawt ngaihtuah ai chuan quarterfinal kan lut tih hi kan rilruah awm se ka duh zawk. Hun tawp lam minute nga kan hman dan khan min ti lawm lo ngei a, mah se kan inkhel aṭang khan thil ṭha tam tak hmuh tur pawh a awm tho a ni," tiin quarterfinal an luh vanga a lawm thu a sawi.
Argentine manager chuan Griezmann-a chungchang sawilang nghalin, "Griezmann hian goal a khung chuan a khel ṭha sawt angin a lang ṭhin a, thudik erawh chu a goal khung loh lai pawhin a khel ṭha ṭhin tih hi a ni. Goal a khung hian kan ṭangkaipui lehzual tih erawh phat rual a awm lo," tiin a match hnuhnung pathuma goal thum khungtu forward chu a fak.
Ramos-a dam
Real Madrid captain Sergio Ramos chuan hliam vanga Granada 5-0 a an hnehna inkhel leh Sevilla 3-0 a an hneh ṭumin a hmel lan lo mah se team training a zawm leh tawh. Real Madrid chuan,"Sergio Ramos chuan team training a zawm ve leh thei ta. Captain kan lo lawm a che," tiin Spanish defender hi Real-a a khelhpui te nen an training lai twitter lamah an tarlang.
Ramos hi dam tawh mah se zanina Sevilla an hmachhawn hunah erawh first leg-ah 3-0 a hnehna an chan tawh tho avangin chawlh hahdamtir a nih a rinawm zawk a, Pepe chu chawn hliam vanga a la chawlh mek bawk avangin match thum chhung a zawna an din dunna ni turin Nacho leh Raphael Varane chu Real tlarhnung laiah inkawp leh tura beisei an ni.
Hetihrual hian Real tan hahdam taka inkhel hmachhawn tum ngawt erawh a fuh bik lo thei. Sevilla hian an match hnuhnung pangaah goal 20 zet an khung thei a, an match hnuhnung pangaa goal 15 khungtu Real aiin goal nga zetin an khung tam zawk - zaninah an mikhual Real lakah goal li tal khung an ngai tih hriain an khel dawn a, Zidane-a naute tan fimkhur a ṭul ang.