Murray-a'n a elpui Djokovic a hlau lo

Andy Murray chuan tunlai khawvela a elpui lian leh hautak ber Novak Djokovic chu a hlauh bik loh thu leh Australian Open-ah a hneh ngei a beisei thu a sawi.

Kar hmasa khan Murray hian Qatar Open final-ah Djokovic a hneh lo a, tunkara ATP ranking chhuak thar berah erawh point 12,560 hmuin hma­hruaitu a la ni tho. Murray hnung chiahah hian point 11,780 hmutu Djokovic a awm a, kum 2002 hnua a vawi khat nan Roger Federer chu a sang zual 10 zingah a tel phak lo.

Kum 29-a upa Murray chuan, "Qatar-ah khan ka khel ṭha thawkhat hlein ka hria. Ka tan chuan kum bul ṭanna ṭha leh hautak tak a ni nghal a, rilru mai ni loin taksa a hah nghal hle. Tunah hian ka taksa a hrisel ṭha a, result ṭha zawk ka neih chhunzawm chhoh theih ka beisei," a ti.

Britain tlangval Murray hi nikum khan a vawi hnih nan Wim­ble­don leh Olympic-ah a cham­pion a, kum tawp lamah Serbian thiampuipa Djokovic dinhmun luahlanin world number 1 nihna a hauh. Qatar Open final-a a chak loh hma khan a zawnin match 28 chhung hnehna a chang zawn hman a ni.

Grand Slam vawi thum champion tawh Murray chuan, "Australian Open-ah hian champion ka duh a, kum dang ang bawkin Novak nen hian kan inhma­chhawn leh ngei ka beisei. Kuminah chuan ṭum danga ka lo chak tawh lohnate theihnghilhin hnehna changtu nih ve tawh ngei ka inbeisei," tiin a sawi.

Tun hnai Australian Open final hnuhnung pahnihah Murray leh Djokovic te hi an inkhel a, hengah hian Djkovic a ding chang ve ve. Kum­i­nah hian seeded pakhatna leh pahnihna an nih dawn avangin final hma chu an inhmachhawn thei lo ang.