Chelsea tan 3 pts leh 3-na

Chelsea-in Thawhlehni zan khan Selhurst Park-ah goal thum an khung a, point thum an hlawh chhuak bakah pathumnaah an invawrhchho bawk.

Frank Lampard-a hote hian 3-2 in Crystal Palace an hneh. Blues tan Olivier Giroud, Christian Pulisic leh Tammy Abraham ten goal an khung a, Palace tan Wilfried Zaha leh Christian Benteke ten khung ve bawkin hun tawp thlengin inkhel boruak a sang.

Mikhual Chelsea-in bul an ṭan ṭha a, minute rukna lekah Willian-a siam chu Olivier Giroud-a'n a khung nghal, goal luh danah erawh Blues an vannei hle.

James Reece-a ball pek chu Willian hian um lutin Brazilian midfielder veng tura tlan ve Gary Cahill chu inhliam vangin a tlu. Referee tan foul ham tur a awm chuang loh avangin Willian-a'n a la tlang a, awlsam takin a goal phah.

Premier League thlir ṭhin chuan West Ham forward Paolo di Canio an hre chhuak nghal ang, Italian forward hian December 2000 khan Everton an hmachhawn ṭumin Toffees goalkeeper Paul Gerrard chu inhliam vanga a tluk avangin ball a man daih.

Di Canio hian FIFA Fair Play Award a dawn phah a, Hammers manager Harry Redknapp erawh a player Di Canio chungah a thinrim takzet. Tun ṭumah hian French forward Giroud-a'n dan ang thlapin goal a khung tih hriat a ṭha a, a goal khung a lawm lo bawk.

Cahill aiah Palace-in Liverpool defender hlui Mamadou Sakho an luhtir a, Chelsea tlarhmain Palace tlarhnung inring ṭhap an la ṭhiat tho. Willian-a ball pek dawngtu Christian Pulisic-a'n 'masala' tlem telhin minute 27-naah goal mawi a khung a, Blues-in 2-0 in hma an hruai.

Chelsea goal hmasa pahnih siamsaktu Willian-a'n ama puala khungna remchang a nei a, Pulisic-a siamsak chu Brazilian midfielder hian goal-ah pet mah se keeper Vicente Guaita-a'n a dansak. 

Chelsea-in goal hniha hma an hruai hnuah Crystal Palace an beidawng lo a, minute 34-naah Wilfried Zaha-a'n kawh zetin box pawn aṭangin a khung. Second half-ah Blues-in bul an ṭan ṭha zawk a, Olivier Giroud-a'n goal hnih khungna remchang hlah mah se Reuben Loftus Cheek-a ball fing zet chu minute 71-naah Tammy Abraham-a'n Chelsea goal thum nan a hmang.

Frank Lampard-a hote tan awlsam taka point thum hlawhchhuah theih ni tawhin a lang a, amaherawhchu Blues-in N'Golo Kante an chhawr theih loh an tuar a; tlarhnunga Kurt Zouma leh Andreas Christensen te inkawp a phui tawk lo. Minute 72-naah Palace-in Blues tlarhnung an ṭhiat a, Patrick van Aanholt pass chu Christian Benteke-a'n a khung. Belgian striker hian season thum chhunga league-a goal ruk a khungna chauh a ni.

3-2 a nih tak avangin Palace-in hun tawp hma thlengin beiseina an nei a, Chelsea an talbuai tel bawk. Injury time-ah Palace defender Scott Dann-a'n goal ban a tauh per a, Frank Lampard-a hote an vannei.

Hun tawp lamah Chelsea talbuai deuh mah se Lampard-a hoten an duh tak point thum an hlawh chhuak a, an khelh dan ni loin an result a lungawithlak. Chutihrualin Kante leh Mateo Kovacic awm lo chunga Lampard-a'n Jorginho aia kum 19 mi Billy Gilmour a thlang daih chuan mak tih a hlawh a, Covid-19 buaina hnuah Italian midfielder hian inkhel bul a la ṭan lo.

Chelsea boss Lampard chuan, "Eng emaw ti lai kha chuan kan khelh dan a fuh tawk lo. A nihna takah chuan 2-0 a nih khan awlsam taka chak thei tur kan ni a, chutiang bawkin 3-2 a nih hnuah pawh goal khung belh thei kan la ni. Kan chance neih tam ngaihtuahin goal kan khung tam tawk lo a, inzir tur kan la ngah hle. Chutihrualin a pawimawh ber chu point thum a ni a, insiamṭhatna tur nei mah ila kan duh chu kan hlawh chhuak," tiin a sawi.