A vawi hnih nan Chhinga Veng an champion

Tualchhung cricket inelna lian - Mapuia Memorial Mizoram Cricket League khelh zawh takah Chhinga Veng an champion. 3C hian Chanmarians chu wicket lia hnehin nomawi an chawi; MCL-ah hian vawi hnih an champion-na a ni nghal bawk.

Chhinga Veng hian 2018 khan hlawhtlinna an lo chang tawh a, MCL bikah chuan inelna an hmachawn apiangin final an lut ziah. Chanmarians erawh 2016 leh 2017 khan hlawhtling mah se, kuminah chuan a vanduai zawk an ni.

Final chu...
Inrinnia Suaka Cricket Ground a inkhelah, ṭhum vawra vannei zawk Chanmarians lamin vuak hmasak an thlang. Chhinga Veng bowler an che ṭha a, captain Lalnuntluanga chuan over li vawmin run 13 chiah a pek laiin wicket thum a la.

Chanmarians an che fuh thei lo, K. Lalremruata'n 25 runs siamin Lalhmangaiha (15 runs) a zia leh hret, player dang zingah 10 runs siam tling thei an awm lo, over 20 chhunga 82 runs chiah siamin mi pakua an in hloh, target sang tak an siam thei lo.

Chhinga Vengin bowler panga hmangin over li ṭheuh an vawm a, wicket la vek bawkin Chanmarians lakah run an pe tlem. Lalhruaimawia Ralte chuan wicket hnih a la bawk.

Beisei angin Chhinga Vengin bat nen bul an tan ṭha bik lo, over hnih a ralin run siam miah lovin wicket hnih an hloh nghal. An target sang lo mah se an bul ṭan dan thlir chuan beisei a sang bik lo, chesual ve thei dinhmunah an ding hman.

Mahse, Gaurav Singh (27 runs) leh K. Vanlalruata (20) te inkawpin an dinhmun an siamṭha. 3C hian wicket ruk an hloh hnuah, over 19 aṭanga 83 runs siamin an target an umphak a, wicket liin an chak.

3C hun a thleng
Tualchhung cricket-in nasa takin hma a sawn a, club hlun leh tun hnaia hmasawn tak tak an awm. MCL khelh ṭan tirh khan champion tur inrinsiak ni ila Chhinga Veng hi buk rit ber an ni lo mai thei, league round an khelh dan thlir phei chuan a ṭha ber an ni lo.

Chanmarians hian hneh loh tawng loin table hmahruaitu an ni thei a, an hma a ding apiang an hneh zel. 3C erawh an chak lohna tura ngaih match pahnihah ruah surin a bumro avangin point an hmu hlauh a, league round tawp lamah che fuh zuiin semifinal an khel.

Semifinal-ah hian Mahuma Memorial (2021-22) leh President's Cup (2021) final-a an ngam loh Ramhlun Venglai an hneh a, inrintawkna sang tak nen final an khelh thei, tournament bul ṭan ṭha tawk lo mah se a tawpah chuan team ṭha bera ngaih an hneh thei.

Hun harsa an tawh laiin Sumit Lama a rintlak a, over 19-na ball tawp berah four vaw chhuakin hnehna a chanpui. Player of the Tournament atan Sumit Lama hi thlan a ni a, match 11 aṭangin 168 runs siamin wicket 13 a la, an innghahna bulpui a ni. Tawnhriat nei ṭha Durtlang tlangval Ruata an la kawl bawk avangin nomawi an chawi hi a mak lo.

Lawmthu
Nomawi an chawi hnuah Chhinga Veng secretary Lalchhandama Sailo chuan, "MCL hi khel theia kan qualify chinah final kan la lut vek a, 2018 khan champion nomawi kan lo chawi tawh. Tun ṭuma champion trophy kan han chawi leh thei hi kan lawm hle.

"Player te thawhrimna rah a taka hmuh theihin a awm a, mimal ang a han khel ṭha fal tak han sawi tur kan nei lo a, team thawhhona dik tak avangin kan champion a ni," a ti a, inelna an hmachhawn theih nana sponsor tu NECS chunga an lawm thu a sawi bawk.

Final - Thlirna Tawi
A hmun: Suaka Cricket Ground, Sihhmui
Chhinga Veng bt Chanmarians
Toss: Chanmarians lamin vuak hmasak an thlang
Chhinga Veng hi wicket liin an chak

Chanmarians CC 82/9 (20)
K. Lalremruata 25(36); Lalhmangaiha 15(20)
Lalnuntluanga 13/3(4); Lalhruaimawia Ralte 18/2(4)
Chhinga Veng CC 83/6 (19
Gaurav Singh 27(45); K. Vanlalruata 20(20)
F. Malsawmtluanga 7/1(3); TC Vanlalremruata 14/1(4)
MoM: Lalnuntluanga, Chhinga Veng

Mimal Chawimawina
Man of the tournament Sumit Lama, Chhinga Veng
Best Bowler Bobby Zothansanga, Chanmarians
Best Batsman Lalhruaizela, Chanmarians
Best Fielder Saidingliana Sailo, Chanmarians
Most Promising Player Johan Lalbiakkima, Ramhlun Venglai