MPL Under 18 champion FC Venghnuai
Mizoram Football Association leh Mizoram Youth Commission ten an buatsaih Mizoram Premier League Under 18 (2021-2022) final chu Inrinni zan khan Lammualah khelh a ni a, FC Venghnuai chuan league round-a an hneh loh Chhinga Veng chu Lalhualhima goal hmangin 1-0 a hnehin an champion.
MPL kum bithliah inelnaah hian Chanmari, Mizoram Police leh Chhinga Veng te vawi hnih ṭheuh an champion tawh a, Dinthar FC vawi khat an champion tawh bawk. FC Venghnuaiin coach Lalrindika Hmar kaihhruainain bung thar an kai a, champion tawh zingah an hming a chuang ve ta.
Zan boruak
Covid-19 hnua Lammuala football inelna lan tham buatsaih leh hmasak ber a ni a, hri lengin ziaawm lam a pan tawh bawk avangin mipui pungkhawm pawh an ṭhahnem hle.
Tlai lamah ruah sur mah se zan lam boruak erawh a nuam a, entu an ṭhahnem avangin zan lamah traffic a 'jam' hial. Chhinga Veng ṭan turin Zomuanthanga Stand khat an pung khawm a, Venghnuai ṭantute an la ṭhahnem zawk. K. Kawla Stand-ah leng loin S. Malsawmtluanga Stand-ah ṭhahnem tak an ṭhu bawk.
Final chu...
MPL theme song a ri a, player-ten khelmual an luh aṭangin mipui thawm a ṭha nghal. Inkhelh ṭan hmain Inrinnia vui liam tak Mizo footballer Sama Hnamte leh K. Lalhmangaiha sunna neih a ni a, Hmangaiha hi footballer hrang hlui niin Mizoram tan kum bithliah leh senior team thlengin a khel tawh a, Venghnuai assistant coach K. Lalthlamuana pa a ni bawk.
Final-ah hian league round-a pakhatna Chhingcows hi champion tura rinkai ni zawk mah se ṭan phat aṭangin Venghnuai an khel ṭha zawk. FC Venghnuai hian semifinal-ah league round-a an hneh loh Chanmari chu 3-0 in an hneh a, an inringtawk hle.
Minute khatna lekah Venghnuai forward T. Malsawmzuala'n a hun ṭha neih chu a hmang ṭangkai lo. RM Zothansanga pawhin freekick a pet over bakah Lalchhanchhuaha'n coner kick aṭanga ball kal a tauh over bawk.
Chhinga Veng an insiamrem thei lo a, amaherawhchu striker ṭha Lalnunzira Sailo-in chance ṭha insiamchawpin goal pawnah chiah kawh zetin a pet. Chhingcows tan chanchin ṭha lo hriat tur a awm zui a, best forward atana thlan Zira hi hliam vangin minute 22-na lekah lakchhuah a ni.
Venghnuai an chungnung chhunzawm a, Chhanchhuaha goal khung tur chu Chhingcows defender Laltluangliana'n a kutin a dangin lang mah se referee-in corner kick a pe zawk. First half-ah goal a lut lo a, Venghnuai an khel ṭha zawk.
Goal khat a tawk
Venghnuaiin inkhel an thunun theih nan tlarhnunga awm captain Laldanmawia a pawimawh a, Chhinga Veng tlarhmaten Danmawia leh a hote an ti nghing zo lo.
Freekick hmangin Danmawia hian tlarhma a pui tel a, second half ṭantirhah a freekick pet ṭha zet chu keeper Lalhruaizela'n a dansak. Goal an khungna pawh Danmawia freekick aṭanga kal tho a ni a, keeper Hruaizela'n nam per ṭha tawk loin Lalhualhima minute 81-naah goal awmchhun a khung.
Venghnuai coach Rindika'n a naute a hrual ṭha a, match tinah hmasawnna hmuh tur awmin hun pawimawhah chiah an ṭhat dan berin an khel chhuak. Final-ah hian Rindika'n wing back C. Ngurnuntluanga chu best midfielder atana thlan Aron Vanlalrinchhana veng turin a dah a, a ti fuh hle.
C. Nuna'n Chhingcows innghahna Aron-a a ven hneh zarah Venghnuai nuamsa zawkin an chak thei a, chutihrualin ṭha taka an khel theih nana thiam taka au phurtu Venghnuai mipuiten fak an phu hle.
Chhuanlam a awm
Chhinga Veng coach H. Lalremruata chuan, "Player inhliam kan ngah a, player 11 zinga paruk vel ngawt kha hliam nei chunga khel an ni. Zira khan a ke na lai a rap sual leh a, a khel zui thei ta lo. Kan ṭhat theih dan berin kan khel thei lo a, champion ngei duh mah ila player-ten hliam an nei tih an hre tlat," tiin hliam an neih vanga an khelh ṭhat tawk loh thu a sawi.
Remruata chuan sawi chhun-zawmin, "Lawmna tur erawh ṭhahnem tak kan nei. Player ṭha sa kan la lo a, tournament khelh hma deuhin trial kan ko a, chuta ṭang chuan player kan thlang. Champion loh chu a uiawm a, chutih rualin kan thlen chinah kan lawm e," tiin Vanglaini a hrilh.
Venghnuai an hlim
FC Venghnuai coach Lalrindika Hmar chuan, "Season hnuhnung ber I Day Football-ah he hmunah tho hian final-ah ka chak lo tawh a, chak loh hrehawmzia ka hria. Nomawi chawi ngei tumin league-a kan team pahnih kan hneh lohna lai kan zir a, hlawhtlinna kan hmu. Pathian ṭanpuina vangin kan champion ve ta!
"Player-te thawhrimna vangin ka lawm. 3-5-2 formation kan hmang a, hlawhtlinpui lo tura min ngai tam tak an awm laiin, player-ten kar khat lek chhungin an man a, hna ropui tak an thawk a ni, champion phu khawpin an thawkrim. Veng mipui min ṭawiawmtu te kha kan champion na pakhat a ni," tiin Vanglaini a hrilh.
Rindika chuan an champion chu assistant coach Thlamuana pa K. Lalhmangaiha tan a hlan thu a sawi. Venghnuai coach chuan, "Ama tan hian kan hlan! Dressing room briefing-ah pawh chaw pawh ei peih tawh loa a awm pawhin result hi a ngaihven reng a, vawiin hian kan chak lo thiang lo. I hah viau pawhin i bana thil dum hren kha ngaihtuah ang che u," tiin player-te an fuih dan a sawi chhuak.
Thlirna Tawi
MPL U18 Final - April 30, Inrinnni
FC Venghnuai 1 - 0 Chhinga Veng FC
FCV : Lalhualhima 81'
Lawmman
Champion FC Venghnuai
Runner Up Chhinga Veng FC
Top Scorer Lalbiakmuana (7 goals) Mizoram Police FC
Best Player Laldanmawia FC Venghnuai
Best Goalkeeper Joel B Lalramchhana FC Venghnuai
Best Defender Lalramsanga Chhinga Veng FC
Best Midfielder Aron Vanlalrinchhana Chhinga Veng FC
Best Forward Lalnunzira Chhinga Veng FC
Fairplay Electric Veng FC