City leh Reds inum boruak a sang

Premier League champion pakhat chauh an awm dawn. Manchester City leh Liverpool ten nomawi chawitu zawk nih tumin tha an thlah duh lo, a tawp ni thlengin an inum boruak hi a nung chho dawn niin a lang ta.

Liverpool-in Inrinni tlaiah match an khel hmasa, an player ṭha ṭhenkhat khek chungin Newcastle United 1-0 in an luhchhuah. Jurgen Klopp-a naute hi table chung berah an awm nghal a, pahnihna Man City aia an sanna chu point hnih a ni.

Zan lamah Pep Guardiola naute an inlan ve thung. Citizens pawhin player an dahṭha - Champions League semifinal khelh dawn vang a ni. Leeds United 4-0 ngawtin an sawp thei tho a, table chung ber aṭanga Liverpool an nek chhuak leh nghal bakah goal difference an siamṭha.

Salah tel lohna
Liverpool hian Villarreal lakah 2-0 a hma hruaiin Champions League final an hnaih tawh. Thawhlehni zanah semifinal second leg khel turin Spanish club an tlawh dawn, kartawpah Tottenham an mikhual zui bawk ang.

Klopp-a'n player siksawi a ngai tih a hria, match hnuhnung bera bul ṭantu panga a dah chhuak. An zingah hian Mohamed Salah, Thiago, Fabinho leh Trent Alexander-Arnold te pawh an tel.

Luiz Diaz, Diogo Jota leh Sadio Mane te hmangin goal an nawr a, a khungtu erawh Naby Keita a ni thung. Keita hian minute 19-naah goal awmchhun a khung, box chhungah keeper thlenga a bum hnuin defender pahnih inkarah a khung a ni.

Mane-a'n remchang nei mah se keeper Martin Dubravka a paltlang ve lo a, captain Jordan Henderson-a cross pawh Jota-a'n tauh ṭha viau mah se Dubravka bawkin a lo dansak. Magpies tan Reds tlarhnung sut hawn erawh a harsa hle thung.

4 star City
An elpui Liverpool an chak tih hre mah se Pep Guardiola leh a naute an buai phah lo. Real Madrid tlawha an zin leh nghal a ngaih dawn avangin Kevin de Bruyne, Bernardo Silva leh Riyad Mahrez te chu bench-ah dah an ni.

Citizens hian player an la nei ṭha tawk tho a, midfielder Rodri hmanga goal hmahruai an khung hnuah - Nathan Ake, Gabriel Jesus leh Fernandinho ten a khat mawi tawkin an inkhung chhawk, goal khung lo mah se assist vawi hnih neitu Phil Foden a khel ṭha hle.

Point thum hmuin table chung berah an awm, lawmna tur a ni. An lawmna tur dang leh chu goal an chuah lo hi a ni ang. Tun hnaiah Man City thlarhnung a nghet tawk lo, Leeds lakah erawh keeper Ederson zarah goal an chhuah lo.

A hliam a dam hnuah Ruben Dias-a'n ngai a awh chho leh tawh, a laiah Aymeric Laporte nen an inkawp rem. Joao Cancelo a rintlak a, a ṭul a nih chuan Portuguese defender hi mual vei lam sirah pawh a hman leh theih ang - Real Madrid muala chak tur erawhin hmasawn an ngai ang.