Trabzonspor hun a thleng leh ta

Super Lig-ah kum tin champion an awm, kumin chu Trabzonspor hlawhtlin hun a ni. An champion hnuhnung ber aṭanga kum 38 hnuah Trabzonspor hian league nomawi an chawi a, fans lamin awm ngaihna hre loin a sapatal.

Inrinni zan khan Trabzonspor hia an mikhual Antalyaspor nen 2-2 in an inhnehtawk, point khat chauh hmu mah se Turkish champion nih nan a tawk a, an hnuaia awm Fenerbahce tan umphak theih an ni tawh lo.

Match khelh hmabak pathum la awmah point kuain an sang fal, an elpui ber Fenerbahce aiin head-to-head record an nei ṭha zawk bawk. An tan league nomawi pasarihna niin, 1975-76 inkar khan a zawnin vawi nga an champion, 1983-84 khan hlawhtling lehin tunah an chhunzawm.

Turkish club zingah Super Lig champion ni thei hi team paruk chiah an awm. Season hmasa khan Besiktas an champion, 2019-20 erawh kha chuan a vawi khat nan Basaksehir an champion thung.