La Liga champion Real Madrid

Real Madrid chuan Inrinni zan khan Santiago Bernabeu-ah Espanyol 4-0 in an sawp a, anmahni hnaih bertu Sevilla-in an umpha thei tawh lo. Carlo Ancelotti hote hian Champions League semifinal second leg-ah Manchester City mikhual zui dawn mah se Italian manager-in a sawi lawk ang ngeiin anmahni ṭantu sing chuang nen champion an lawm.

Los Blancos-in Espanyol hneh turin harsatna an nei lo a, first half-ah Rodrygo-a'n goal hnih khungin second half-ah Marco Asensio leh substitute Karim Benzema ten an khung belh. Real Madrid-in khelmual chhungah champion zia an pholang a, tun season-a an khelh dan thlir kir pawhin champion hi an phu a ni.

Vawi 35-na
Real Madrid-in La Liga nomawi vawi 35 an chawina a ni a, record a ni. Los Blancos hnaih bertu Barcelona-in vawi 26 an champion a, tun hnaiah Catalan club rawn che ṭha ve bawk mah se an history pumpui thlir kir chuan an inthlau hle.

Tun season La Liga-ah Real hi season ṭantirh aṭangin an che ṭha a, mak ang reng tak erawh tun season league-a an hneh loh hmasak ber chu Inrinni zana an sawp Espanyol hi an ni a, nikum October 3 khan 2-1 in an hneh lo. Real hian Getafe leh Barcelona te an hneh lo bawk a, ṭum ruk inhnehtawkin a bak match 25-ah erawh an chak vek.

Ancelotti hote hian El Clasico-a Barca an hneh loh hnuah vawi nga an chak leh tawh a, champion-na kawngah Karim Benzema chu 'a changtupa' niin goal 26 tehmeuh a khung. Brazlian rawlthar Vini Jr-a che ṭha bawk a, goal 14 khungin Real tan league bikah French forward hnaih bertu a ni.

Real Madrid hian La Liga chauh hi an thunun lo a, Champions League-ah pawh vawi 13 champion tawhin nomawi chawi ngun ber record kawltu an ni. Tun season UCL-ah pawh semifinal an thleng a, May 4, Nilaini zan hian Manchester City nen second leg an khel leh ang.

An Phu
La Liga-ah match li khelh tur a la awm a, Real Madrid hian point 81 hmuin Sevilla-in point 17-in an pha tawh lo. Real leh anmahni hnaih bertu Sevilla dinhmun thlir hian champion an phu tih a nemnghet.

Club president Florentino Pérez chuan, "Spain leh khawvel hmun hrang hranga 'madridistas' tan chuan hun duhawm bik a ni. Ancelotti hian vawi tam tak a club enkawl leh kan club danglamna min hrilh tawh a, a danglamna chu player-te hi Madrid ṭantute an nih thu min hrilh. Keini tan chuan Real Madrid ṭantute an nih hi malsawmna tih loh rual a ni lo," tiin a sawi a, manager Ancelotti leh player-te a fak bawk.

Kum 75 mi Perez hi Real Madrid president vawi 15-na leh 18-na a ni a, Los Blancos-in tun dinhmun an thlen nan hian a pawimawh takzet. Tuna nomawi an chawi hi president a nih chhunga nomawi 50-na a ni a, hei hian a hnathawh a sawifiah chiang hle.

Champion an lawm
Covid-19 vangin tun hnai season hnih chhung chu champion team pawhin an phu angin champion an lawm thei ṭhin lo a, La Liga chauh ni loin khawvel hmun hrang hranga thil thlen dan a ni.

Tunah erawh Covid-19 hri a reh chho a, Madrid-ah pawh mipui sing chuangin player-te nen champion an lawm a, a boruak chu pui tak a ni. Real captain Marcelo chuan, "Kum hnih liam ta khan champion a, fan-te nen kan lawm thei lo. Tunah erawh fan-te kan lawm thei a, min thlawpna avangin kan lawm takzet," tiin a sawi.

Espanyol laka goal hnih khungtu Rodrygo pawhin a tan hun duhawm bik a nih thu a sawi a, Nacho leh Dani Carvajal te pawhin fan-te nena champion lawm chu a hlimawm thu an sawi bawk.

Record thar siamtu Ancelotti
Carlo Ancelotti chu Europe-a league sang pangaa champion vek thei hmasa ber a ni. Italian manager hian Serie A, Premier League, Ligue 1, Bundesliga leh La Liga-ah a champion vek.

Kum 62 mi Ancelotti hi Roma leh AC Milan tan hlawhtling takin player a nih laiin a khel tawh a, 1990 FIFA World Cup-ah khan Itlay chu pathumna a nihpui. Midfielder ropui hi tunah chuan khawvelin manager ropui angin an hre tawh zawk. Italian manager hian AC Milan, Chelsea, PSG, Bayern Munich leh Real Madrid te chu an ram league-ah ṭheuh a champion pui.

Ancelotti hian ama pualin nomawi 22 a chawi tawh. Chung nomawi te chu Champions League (3), Club World Cup (2), European Super Cup (3), Intertoto Cup (1), Spanish League (1), English League (1), Italian League (1), French League (1), German League (1), Copa del Rey (1), English Cup (1), Italian Cup (1), Spanish Super Cup (1), Community Shield (1), Italian Super Cup (1), Italian Super Cup (1) leh German Super Cup (2) te an ni.