US Open atan Nadal a chiang lo

Rafael Nadal chu US Open-ah a inlan thei dawn em tih a chiang lo, hard court inelna lian champion lai hian Madrid Open erawh a khelh tur thu a tichiang tawh thung.

Covid-19 vangin tennis season kalphung a danglam nasa. US Open erawh an ruahman sa angin August 31 aṭanga September 13 thleng khelh a ni dawn; New York khawpuia tournament an khelh zawh tuk aṭangin Madrid Open an ṭan thung dawn.

Season hmasa khan Nadal-a'n US Open-ah hian Grand Slam title 19-na a chawi a, kuminah hian champion lai ni chunga inlan tur a ni. Hri leng vanga tournament khelh dan phung tih danglam a tam avangin a inhnaihchilh hlawm a, season dang nen a inang thei ta lo.

Madrid Open tournament director Feliciano Lopez chuan, "Rafa chuan Madrid khawpuia a inkhelh tur thu a tichiang," a ti. Spanish tlangval hian Davis Cup tana a khelhpui a ṭhiante hnenah 'Madrid-ah kan inhmu dawn nia' tih a lo sawi tawh bawk.

Kum 34 mi Nadal hian Grand Slam nomawi 19 a lak tawh zinga 12 chu French Open a ni a, a vanglai pawhin hard leh grass court ai chuan clay court chu a inkhelh thiamna hmun a ni. Roland Garros hi September 27 aṭanga khelh a ni dawn, Paris khawpuiah ṭha taka inlan tur chuan inbuatsaihna ṭha neih a ngai a, chumi atan chuan Madrid Open khelh a pawimawh - Nadal hian US Open a khel lo a nih pawhin a mak lo ang.

US Open hi a hmuna entu awm loin khelh a ni dawn a, Swiss star Roger Federer chu hliam vangin a inlan thei dawn lo. World number 1 Novak Djokovic pawhin a inlan thei dawn em tih a la sawi chiang lo. Mipa player langsar an tel thei lo a nih pawhin hmeichhe lam erawh an inlan ṭhat a rinawm. Vawi ruk champion tawh Serena Williams chuan a tel tur thu a sawi chiang tawh thung a ni. Simona Halep leh Ashleigh Barty pawh an inlan a rinawm.