Arunachal-ah Mizo cyclist an langsar

Arunachal Pradesh a thirsakawr intlansiak MTB MOOPIN 2022-ah Mizoram aṭanga telte an che ṭha hle. Kum 35 chunglam inelna - Master class, 152km a thui intlansiakah Michael Laldinsanga Ralte, Aizawl Mission Vengthlang chu pakhatna a ni.

Kum 19 hnuailam tana buatsaih 90km a thui intlansiakah, Aizawl Bawngkawn tlangval Lalruatfela chu pahnihna a ni bawk.

Men's Elite (152km a thui inelna) ah Mesak Vanlalvena, Sihfa chu pangana niin, a hnung chiahah Laldintluanga, Chanmari, Aizawl leh Mark Zoliansanga, Lunglei (LuDCA) te an thleng a, Lalhruaichhunga, Lunglei (LuDCA) chu pakuanaah a tlan thleng bawk.

MTB MOOPIN hi India rama thirsakawr intlansiakna zingah, ni khata tlan kawng thui bera sawi a ni. Tun ṭumah pawh hian 152km zeta thuiah thleng hmasa ber nih tumin an intlansiak a ni. Tlankawng hi a chhuk chho in, a ṭhenah chuan a bumboh hle.

Mizoram aṭanga intih-siaka telten tlankawng an zawh chhuak vek thei a, dinhmun ṭha tak tak an chelh phak chu Mizoram Cycling Association (MiCA) chuan lawmawm a tiin, Mizoram Cycling hmasawnna rahbi pawimawh takah a ngai a ni.

Mizo cyclist te hian lawmman atan trophy, medal leh certificate bakah pawisa fai thahnem tak an hlawh chhuak a ni. Mizoram atanga cyclist kalte hi Mizoram Cycling Association (MiCA) hriatpuinain Team Cycle Shop hminga tel an ni.