EPL aṭanga tla hmasa ber Norwich City

Premier League aṭangin Norwich City an tla fel. Khelh hmabak pali la awm mah se Canaries hi an in hamtang thei tawh lo, an chunga awm Watford chu tla leh mai thei dinhmuna ding an ni bawk, him tur chuan thil mak a thlen a ngai dawn.

Inrinni zan inkhelah Norwich City hi Aston Villa lakah 2-0 in an tlawm. Match 34 aṭangin point 21 chauh an nei a, a him china awm Leeds United an phak lohna chu point 13 a ni tawh a, an tan inhamtan theih a ni tawh lo.

Tlak hlau inkhel dangah Burnley chu Watford 2-1 in an lehthal, hun tawp dawna si phurh an sut bakah chakna goal an khung. Burnley hian him tura beiseina an neih san zel laiin, chak lo Watford erawh chak vek mah se Leeds an tlawm vek a nih loh chuan kawng a awm tawh chuang lo.

Mangṭha Norwich
Norwich hian an tla dawn tih an hre lawk, an tan kawng a zim zia pawh an hria. Villa Park-ah fans an pungkhawm ṭha tho a, dinhmun harsa an tawh lai pawhin club an phatsan lo, a tawp thlengin an thlawpna an lantir.

Brandon Williams-a tihsual vangin Ollie Watkins chuan Villa goal hmahruai a khung, hnai takah chiang zetin a hlap lut - inrintawkna a nei sang tih a lang bawk, goal hnuhnung zawk erawh hun tawp dawna Danny Ings khung a ni thung.

Defender Williams chet dan khan Norwich dinhmun a sawifiah viau. Holam taka chetsual an ching, goal khung theihna remchang han insiam ve ṭhin bawk mah se an khung thei lo, season kal laia goal khung tlem ber (22 goals) an nih avangin an tla hi a mak lo.

Villa hian goal bar vawi hnih an tih per a, goal tam zawk an khung lo kha Canaries an vannei. Steven Gerrard enkawl Villa hian point 40 hmuin 13-naah an awm a, season dangah chuan point 40 hmu chin hi chu an him ṭhin, kuminah an him leh a rinawm.

Kir leh ang
Tla mah se Norwich City manager Dean Smith a beidawng lo a, club chhuahsan tumna a nei hran lo. Smith chuan, "English football inelna sang bera kan kir leh theih nan ruahmanna siam a ni tawh, a nihna tak sawi chuan tun hnai kar li vel aṭang khan hei hi kan ngaihtuah tawh.

"Kan thlak avang hian a hrehawm, khel ṭha pangngai tak chunga goal kan khung thei lo ṭhin hi a pawi. Tun match bikah chauh pawh a ni lo, season tluana kan inkhel kha kan thlir kir a nih chuan goal hmaah kan hriam tawk lo," a ti.

Norwich City hian EPL khel tura tlin chu an harsat lo, mahse inhamtan tak hi an harsat lai chu a ni. Tun hnaiah a zawnin vawi thum ngawt Championhsip aṭangin an inpet kai a, amaherawhchu an tlahniam lehnghal zel.

Manager Smith sawi ang hian tlarhma an hriam lo chu an buaina a ni. Shot nei tlem ber (336) an ni a, target zawna shot tlem ber (100) leh shot hlawhtling tlem ber (7%) an nih miau avangin Premier League club dang an el phak lo.

Burnley an vannei
Tlak hlauhthawn awm zinga mi Burnley chuan hun tawp dawnah goal hnih an khung a, anmahni ang bawka tlak hlau Watford chu 2-1 in an hneh. Minute riatna lekah James Tarkowski-a own goal chu Jack Cork (83') leh Josh Brownhill (86') ten an chhang let a ni.

Hornets hi anmahni mualah a zawnin vawi 11 an tlawmna a ni ta. Chiarkawp dan chuan an la him hram hram, mahse khel hmabak pali an la neihah chak vek se, an chunga awm Leeds an tlawm vek bawk chuan an la him thei tih chauh a ni tawh, an tla ngei ang tih a sawi ngam.

Roy Hodgson tan meuh pawh Watford chhanhim hi thil awlsam a ni dawn lo. Kum 74 mi Hodgson hian team ṭhenkhat chu a lo chhanhim ṭhin tawh ngei mai, kuminah erawh - Crystal Palace, Everton, Leicester City leh Chelsea te an la tum dawn, a harsa khawp ang.

Burnley erawh tla thei china awm Everton aiin point ngain an sang ta. Toffees hian match hnihin an khel tlem thung, chutih rualin Frank Lampard-a naute hian nizan khan team ṭha Chelsea an hmachhawn a, result kan hre hman lo.